ഉൾകൊള്ളാൻ ഉൾകാഴ്ചകൾ:The Art of innerspring insight-172

 തുറന്നു പറയേണ്ട കാര്യങ്ങൾ തുറന്നു പറയുക തന്നെ വേണം.പല കാര്യങ്ങളും പരസ്പരം തുറന്നു പറയാത്തതിന്റെ പേരിൽ ദുഃഖം അനുഭവിക്കുന്ന ഒത്തിരി മനുഷ്യരെ നമ്മളുടെ ചുറ്റിലും നോക്കിയാൽ കാണാൻ കഴിഞ്ഞേക്കും.

ഇഷ്ടം തുറന്നു പറയുക, വിഷമം തുറന്നു പറയുക, സത്യം തുറന്നു പറയുക ഇതെല്ലാം എല്ലാവർക്കും എല്ലായ്‌പോഴും എളുപ്പം സാധിക്കുന്ന കാര്യമല്ലല്ലോ.നമ്മുടെ സങ്കടങ്ങൾ വേണ്ടപ്പെട്ടവരുമായി പങ്കുവെക്കുമ്പോൾ വലിയൊരു ഭാരം തന്നെ നമ്മളിൽ നിന്നും ഒരുപക്ഷെ ഒഴിഞ്ഞു പോയേക്കാം.

നമ്മുടെ ദുഃഖദുരിതങ്ങൾ നമ്മൾ, നമ്മളുടെ വേണ്ടപ്പെട്ടവരോട് പങ്കുവെക്കാത്തിടത്തോളം കാലം നമ്മുടെ വിഷമം ഒരുപക്ഷെ നമ്മുടെ വേണ്ടപ്പെട്ടവർ അറിയണം എന്നില്ല.നമ്മുടെ വിഷമങ്ങൾ മറ്റുള്ളവരോട് പങ്കുവെക്കുന്നതിൽ മടി വിചാരിക്കുന്നവരും ഉണ്ടായേക്കാം.

നമ്മുടെ സങ്കടങ്ങൾ ഈ ലോകത്തോട് ആവശ്യമെങ്കിൽ വേണ്ടരീതിയിൽ വിളിച്ചു പറയണം, എങ്കിലാണ് ചുറ്റിലുമുള്ള നല്ലവരായ മറ്റു മനുഷ്യർക്ക് നമ്മുടെ ആവശ്യം കണ്ടറിഞ്ഞു നമ്മളെ സഹായിക്കാൻ ഒരുപക്ഷെ കഴിയുകയുള്ളു.

ആരോടും തുറന്നു പറയാതെ വിഷമം ഉള്ളിലൊതുക്കി ജീവിക്കുന്ന ഒരുപാട് മനുഷ്യർ, തങ്ങൾക്കുണ്ടായ ദുരനുഭവം പുറംലോകത്തെ അറിയിക്കാത്തതിന്റെ പേരിൽ പിന്നീട് തനിക്കുണ്ടായ അതേ അനുഭവത്തിലൂടെ മറ്റുള്ളവരും ഒരുപക്ഷെ കടന്നുപോകാനുള്ള സാഹചര്യം ഉണ്ടായെന്നു വന്നേക്കാം.

സത്യം തുറന്നു പറയാത്തതിന്റെ പേരിൽ ഇന്നിപ്പോൾ എത്രമാത്രം സങ്കടങ്ങളാണ് ഓരോ മനുഷ്യരും അനുഭവിച്ചുകൊണ്ടിരിക്കുന്നത്.സത്യം എത്ര നാൾ കഴിഞ്ഞാലും പുറത്തു വരിക തന്നെ ചെയ്യും.

രഹസ്യം ആയി സൂക്ഷിക്കേണ്ടവ മറ്റുള്ളവരോട് വെളിപ്പെടുത്തേണ്ടതില്ല. രഹസ്യം പരസ്യം ആക്കിയാൽ ഒരുപക്ഷെ നമ്മുടെ സന്തോഷം ഇല്ലാതെയായെക്കാം.

തുറന്നു പറയേണ്ട കാര്യങ്ങൾ വേണ്ടപ്പെട്ടവരോട് തുറന്നു പറയാനും തുറന്നു പറയാൻ പാടില്ലാത്ത കാര്യങ്ങൾ ആരോടായാലും തുറന്നു പറയാതിരിക്കാനും കഴിയട്ടെ.