ഉണർവിൻ പൊൻകിരണങ്ങൾ:The awakening golden rays-356

നമ്മളിൽ പലരും പലപ്പോഴും പലതരത്തിലുള്ള സാഹസത്തിന് മുതിരാറുണ്ട്, ഒരുപക്ഷെ സാഹചര്യത്തിന്റെ സമ്മർദ്ദം കൊണ്ടാകാം.

വേണ്ടത്ര സുരക്ഷാ മാർഗം സ്വീകരിക്കാതെ സാഹസം ചെയ്യുന്നതിലൂടെ പലരുടെയും ജീവൻ നഷ്ടപ്പെട്ടിട്ടുണ്ട്.

സാഹസത്തിലൂടെ ഒരുപക്ഷെ ലാഭവും അല്ലെങ്കിൽ നഷ്ടവും ഉണ്ടായേക്കാം.

ജീവിക്കാനായി എന്തു സാഹസത്തിനും മുതിരാൻ തയ്യാറായിട്ടുള്ളവരും നമ്മുടെ ചുറ്റിലും ഉണ്ടാകാം.

പല വേദികളിലും സാഹസപ്രകടനം കാഴ്ച വെക്കുന്നവർ ഒത്തിരി നാളത്തെ പരിശീലനത്തിലൂടെ കഴിവ് സ്വന്തമാക്കിയിട്ടാണ് അതെല്ലാം ചെയ്യുന്നത്, ഒരിക്കലും അനുകരിക്കരുത് എന്ന് നിർദ്ദേശം നൽകാറുണ്ടെങ്കിൽ പോലും ആരും അതിന് വേണ്ടത്ര ശ്രദ്ധ കൊടുക്കുന്നില്ല എന്നത് വളരെ പരിതാപകരമാണ്.

ആരോഗ്യത്തിന് ദോഷകരമായ ഭക്ഷണപാനീയങ്ങൾ കഴിക്കുന്നത് ശരീരത്തിന് വളരെയേറെ ദോഷകരമാണ് എന്നറിഞ്ഞിട്ടും നിമിഷസുഖത്തിനു വേണ്ടി അതെല്ലാം ഉപയോഗിക്കുന്നത് സ്വന്തം ജീവന് വേണ്ടത്ര പരിഗണന നല്കാത്തതുകൊണ്ടാണ്.

പഴക്കം ചെന്ന, മായം കലർന്ന ഭക്ഷണ പാനീയങ്ങൾ ഉപയോഗിച്ചതുവഴിയായി ഒത്തിരിപേരുടെ ആരോഗ്യനില മോശമാകുകയും അവരിൽ ചിലർക്കൊക്കെ മരണം സംഭവിക്കുകയും ചെയ്തിട്ടുണ്ട്.ഭക്ഷണം കൊടുത്തവർ സാഹസം കാട്ടിയപ്പോൾ നിരപരാധികളായ മനുഷ്യരാണ് ആ ഭക്ഷണം കഴിച്ചതിലൂടെ സ്വന്തം ജീവൻ നഷ്ടപ്പെടേണ്ടി വന്നത്.

മനുഷ്യരുടെ ജീവന് വില നൽകാനും മറ്റുള്ളവരുടെ ജീവൻ അപകടത്തിലാക്കുന്ന സാഹസത്തെ ശക്തമായ നിയമസംവിധാനത്തിലൂടെ നിയന്ത്രിക്കാനും സാധിക്കണം.

സാഹസം വഴിയായി ഒത്തിരി ആളുകളുടെ ജീവിതമാണ് ദുരിതത്തിൽ ആയിരിക്കുക. സാഹസം വഴിയായി നഷ്ടപ്പെട്ട മനുഷ്യരുടെ ജീവൻ ആർക്കും ഒരിക്കലും തിരിച്ചുകൊണ്ടുവരാൻ കഴിയില്ലല്ലോ.ഒത്തിരിയേറെ പ്രതീക്ഷകളും സ്വപ്നങ്ങളുമാണ് നിമിഷം നേരം കൊണ്ടു ഇല്ലാതെയായത്.

സ്വന്തം ലാഭത്തിന് വേണ്ടി മറ്റുള്ളവരുടെ ജീവൻ സാഹസത്തിനു വിട്ടുകൊടുക്കാതിരിക്കാൻ വളരെയധികം ശ്രദ്ധിക്കുക.

മറ്റുള്ളവരുടെ അറിവില്ലായ്മമൂലം എന്തെങ്കിലും സാഹസത്തിന് മുതിരുന്നതുകണ്ടാൽ ശരിയായ കാര്യങ്ങൾ പറഞ്ഞു മനസ്സിലാക്കി പിന്തിരിപ്പിക്കാൻ ശ്രമിക്കുക.

എല്ലായിടത്തും സാഹസം കാണിക്കുന്നവരെ തടയിടാൻ എല്ലാവർക്കും കഴിഞ്ഞെന്ന് വരില്ലല്ലോ.

അപകടത്തിൽപെട്ടവരെ സാഹസകരമായ പ്രവർത്തനത്തിലൂടെ മാത്രമായിരിക്കും ഒരുപക്ഷെ രക്ഷപ്പെടുത്താൻ സാധിച്ചെന്ന് വരിക. ഏതൊരു സാഹസത്തിനു മുതിരുമ്പോഴും വേണ്ടത്ര സുരക്ഷാ ഒരുക്കേണ്ടതുണ്ട്, ഇല്ലായെന്നുണ്ടെങ്കിൽ ഒരുപക്ഷെ രക്ഷപ്പെടുത്താൻ ശ്രമിച്ച ആൾക്കും മോശമായ സ്ഥിതിവിശേഷം ഉണ്ടായെന്നു വരാം.

എന്ത് സാഹസത്തിനു ആയാലും അതിനു വേണ്ടതായ ആന്മധൈര്യം നേടേണ്ടതുണ്ട്.

പല സാഹചര്യത്തിലും നമ്മൾ ഓരോരുത്തരും സാഹസത്തെ നേരിടേണ്ടി വന്നേക്കാം.

പരിമിതികൾ ധാരാളം ഉണ്ടായിട്ടുകൂടി അതിനെയെല്ലാം നേരിട്ടുകൊണ്ട് മുന്നോട്ട് പോകുന്ന വ്യക്തികൾ എല്ലാം തന്നെ അവരുടെ ജീവിതത്തിൽ സാഹസത്തിനു തയ്യാറായതുകൊണ്ടാണ് അവരുടെ പരിമിതികളെയെല്ലാം ഒരുപരിധി വരെ അകറ്റാൻ ഒരുപക്ഷെ സാധിച്ചത്.

ഒരു തരത്തിൽ പറഞ്ഞാൽ നമ്മൾ എല്ലാവരും ഒരു സാഹസത്തിലാണ് മുന്നോട്ട് പോയികൊണ്ടിരിക്കുന്നത്, അടുത്ത നിമിഷം നമ്മുടെയൊക്കെ ജീവിതത്തിൽ എന്തു സംഭവിക്കും എന്ന് ആർക്കും മുൻകൂട്ടി പ്രവചിക്കാൻ ആകില്ലല്ലോ.

പലപ്പോഴും സാഹസം കാണിക്കാൻ എളുപ്പം ആയിരിക്കും, പക്ഷെ എങ്കിൽ ആ സാഹസത്തിന്റെ അനന്തരഫലം നേരിടാൻ കഴിയാറില്ല.

ഇരുചക്രവാഹനം ഓടിക്കുന്നവർ ഹെൽമെറ്റ്‌ ധരിക്കണം എന്ന് നിയമം ഉണ്ടെങ്കിൽ കൂടിയും എത്രയോ ആളുകളാണ് യാതൊരു വിധ സുരക്ഷിതത്വം ഇല്ലാതെ റോഡിലൂടെ വാഹനത്തിൽ ഹെൽമെറ്റ്‌ തലയിൽ ധരിക്കാതെ സഞ്ചരിക്കുന്നത്. സാഹസം കാണിച്ചു വരുത്തിവെക്കുന്ന അപകടങ്ങൾക്ക് വേദന അനുഭവിക്കേണ്ടി വരിക അവരവർക്ക് തന്നെയാണ് എന്നത് മറക്കാതിരിക്കുക.

എല്ലാ കാര്യത്തിലും സാഹസം കാണിക്കുന്നത് നമ്മൾക്കു ഉചിതമായെന്ന് വരില്ല.

സമയപരിധിക്കുള്ളിൽ നേട്ടങ്ങൾ സ്വന്തമാക്കാൻ ഒരുപക്ഷെ കൂടുതൽ നേരം വിശ്രമിക്കുന്നത് ഉപേക്ഷിക്കേണ്ടി വന്നേക്കാം.

സമയകുറവ് ഉണ്ടെന്ന് കരുതി റോഡിലൂടെ പോകാനുള്ള സ്പീഡ് പരിധിയേക്കാൾ കൂടുതൽ സ്പീഡിൽ പോകരുത്, കാരണം അതു ഒരുപക്ഷെ നമ്മുടെ ജീവൻ അപകടത്തിലാക്കിയേക്കാം, ഒരുപക്ഷെ നിയമ ലംഘനം നടത്തിയതിന്റെ പേരിൽ സാമ്പത്തിക നഷ്ടവും വരുത്തി വെച്ചേക്കാം.

സാഹസം കാണിക്കേണ്ട സാഹചര്യവും സാഹസം കാണിക്കാൻ പാടില്ലാത്ത സാഹചര്യവും കൃത്യമായി വിലയിരുത്തി മുന്നോട്ടു പോകുവാൻ നമ്മൾ എല്ലാവർക്കും സാധിക്കട്ടെ.