സ്നേഹസ്പർശനമായി കൺമുൻപിൽ:A spark of love to open your eyes-അധ്യായം 37

 37.ആർക്കും ഒരു ഭാരം ആകാതെ കഴിയുക.
നമ്മളിൽ പലരും ആഗ്രഹിക്കുന്നത് നമ്മുടെ ജീവിതം അവസാനിക്കുന്നത് വരെ ആർക്കും നമ്മളൊരു ഭാരം ആകരുത് എന്നാണ്.
ജീവിതത്തിൽ ഭാരങ്ങൾ താങ്ങാത്തവരായി ആരുമില്ല.നമ്മൾ ഇന്നിവിടെ വരെ എത്തിനിൽക്കുന്നതിനു കാരണം നമ്മളെ ഭാരമായി തോന്നാതെ നമ്മളുടെ വളർച്ചക്ക് വേണ്ട സഹായങ്ങൾ ചെയ്തു തന്നവരാണ്.ജീവിതത്തിൽ മറ്റുള്ളവരിൽ നിന്നും വേദന നിറഞ്ഞ അനുഭവങ്ങൾ ഉണ്ടാകുമ്പോൾ നമ്മൾ മറ്റുള്ളവർക്ക് ഒരു ഭാരമായി എന്നൊരു തോന്നൽ ഉളവായേക്കാം.

നമ്മൾ ഓരോരുത്തരും നമ്മുടെയൊക്കെ ജീവിതത്തെ സ്നേഹിക്കാൻ പഠിക്കണം. ജീവിതം എത്ര മനോഹരമാണ് എന്ന് മനസ്സിലാക്കാൻ ശ്രമിക്കണം.ദാരിദ്ര്യത്തെ ചെറുക്കാൻ നമ്മൾ പരിശ്രമിക്കണം.ദുഃഖം ഇല്ലാതെ ആവാനും പരിശ്രമിക്കണം, സന്തോഷം ഉണ്ടാവാനും പരിശ്രമിക്കണം.ഇതെല്ലാം നമ്മൾ വിചാരി ച്ചാലാണ് സാധിക്കുകയുള്ളൂ.
നമ്മളുടെ ജീവിതം മറ്റുള്ളവർക്ക് താങ്ങും തണലും ആണെങ്കിൽ ഒരുപക്ഷെ അവരിൽ ആർക്കും നമ്മളൊരു ഭാരമായി തോന്നുകയില്ല.
ഈ ഭൂമിയിൽ മനുഷ്യർക്ക് ഭാരങ്ങൾ വഹിക്കാതെ മുന്നോട്ട് പോകാൻ ആവില്ല.
നമ്മളിൽ പലരും ജീവിതത്തിൽ ആവശ്യത്തിൽ കൂടുതൽ ഭാരങ്ങൾ വഹിക്കുന്നവരായിരിക്കും.
മറ്റുള്ളവരുടെ ജീവിതം സുഖപ്രദമാകാൻ,മറ്റുള്ള വരുടെ പട്ടിണി മാറ്റാൻ, രാപകൽ ഇല്ലാതെ അധ്വാനിക്കുന്നവർ എത്രയോ വ്യക്തികളാണ് നമുക്ക് ചുറ്റിലും ഉള്ളത്.

പല വിധത്തിലുള്ള സാഹചര്യം ജീവിതത്തിൽ അപ്രതീക്ഷിതമായി കടന്നു വരുമ്പോൾ സ്വന്തം കാലിൽ നിൽക്കാൻ കഴിയാതെ വന്നേക്കാം നമ്മളിൽ പലർക്കും.മറ്റുള്ളവരുടെ സഹായത്താൽ ജീവിതം മുന്നോട്ട് കൊണ്ടുപോകേണ്ടി വന്നേക്കാം.
പലതരത്തിലുള്ള ഭാരങ്ങൾ നമ്മൾക്ക് പലപ്പോഴും ചുമക്കേണ്ടി വന്നേക്കാം.എല്ലാവർക്കും നമ്മൾ ഒരു ഭാരമാകാതെ ജീവിക്കാൻ സാധിക്കട്ടെ