മനം നിറക്കാൻ മധുമന്ത്രങ്ങൾ:mantras to fill the mind-315

നമ്മളിൽ പലരും പല കാര്യങ്ങളും ചെയ്തതിനുശേഷം ആലോചിക്കുന്ന പ്രധാന കാര്യം ഒരുപക്ഷെ വേണ്ടിയിരുന്നില്ല എന്നതാണ്.

പല കാര്യങ്ങളും പിന്നിടാണ് നമ്മൾക്ക് വേണ്ടിയിരുന്നില്ല എന്ന തോന്നൽ സൃഷ്ടിക്കുന്നത്.

സംഭവിക്കാനുള്ളത് സംഭവിച്ചുകഴിഞ്ഞു, ഇനിയിപ്പോൾ വേണ്ടിയിരുന്നില്ല എന്നു ചിന്തിക്കുന്നതിൽ അർത്ഥമില്ല.

വിവേചനബുദ്ധി വേണ്ട സാഹചര്യത്തിൽ വേണ്ടതുപോലെ ഉപയോഗിച്ചാൽ ഒരുപക്ഷെ വേണ്ടിയിരുന്നില്ല എന്ന തോന്നൽ ഒരുപരിധിവരെയെങ്കിലും ഒഴിവാക്കാൻ കഴിഞ്ഞേക്കാം.

നമ്മൾ ആഗ്രഹിച്ചതും ആഗ്രഹിക്കാത്തതുമായ കാര്യങ്ങളൊക്കെ നമ്മുടെയൊക്കെ ജീവിതത്തിൽ ഉണ്ടായെന്നു വന്നേക്കാം.

നമ്മൾ ആരും തന്നെ ആഗ്രഹിച്ചിട്ടല്ലല്ലോ ഈ ലോകത്തിലേക്ക് കടന്നു വന്നിട്ടുള്ളത്.നമ്മൾക്ക് ആഗ്രഹം ഇല്ലെങ്കിൽ കൂടിയും ഈ ലോകത്തിൽ നിന്നും കടന്നുപോകേണ്ടവരാണ് നമ്മൾ ഓരോരുത്തരും.

നമ്മളുടെ ഭാഗത്തുനിന്നുള്ള അല്ലെങ്കിൽ മറ്റുള്ളവരുടെ ഭാഗത്തുനിന്നുള്ള മോശം പ്രവർത്തികളാകാം വേണ്ടിയിരുന്നില്ല എന്ന തോന്നൽ പലപ്പോഴും ഉളവാക്കാനുള്ള പ്രധാന കാരണമായിട്ടുണ്ടാവുക.

പ്രകൃതിനിയമം എല്ലാ മനുഷ്യർക്കും ഒരുപോലെ ബാധകമാണ്, അതുകൊണ്ട് തന്നെ നമ്മൾ എത്ര ആഗ്രഹിച്ചില്ലെങ്കിലും പ്രകൃതിക്ക് ചെയ്യാനുള്ളത് പ്രകൃതി ചെയ്യുക തന്നെ ചെയ്യും.

നമ്മുടെ ആയുസ്സ് തീരും വരെ മറ്റുള്ളവർക്ക് വേണ്ടി നല്ലത് ചെയ്യാൻ ശ്രമിക്കുക. നമ്മളെകൊണ്ട് കഴിയാവുന്ന വിധത്തിൽ നേരായ മാർഗത്തിലൂടെ ചുറ്റുമുള്ളവരെ സഹായിക്കാൻ ഇടവരട്ടെ.

നമ്മൾ സഹായിച്ചവരിൽ നിന്നും തിരിച്ചു നല്ല വാക്കുകൾ കേൾക്കാൻ കഴിഞ്ഞില്ലെങ്കിലും വേണ്ടിയിരുന്നില്ല എന്നു ചിന്തിക്കാതെ നമ്മുടെ കഴിവിന്റെ പരമാവധി ഉപയോഗിച്ചുകൊണ്ട് മറ്റുള്ളവരെ വേണ്ട രീതിയിൽ സഹായിക്കാൻ സാധിക്കട്ടെ.