motivation-320

ഏതൊരു വ്യക്തിയും സ്വാതന്ത്ര്യം ആഗ്രഹിക്കുന്നുണ്ട്. ആവശ്യകാര്യങ്ങളിൽ സ്വാതന്ത്ര്യം നഷ്ടപ്പെട്ടാൽ വളരെയേറെ ബുദ്ധിമുട്ട് നമ്മൾ ഓരോരുത്തർക്കും മുന്നോട്ടുള്ള നാളുകളിൽ ഉണ്ടായേക്കാം.

സ്വാതന്ത്ര്യം ഉണ്ടെങ്കിൽ മാത്രമാണ് പല കാര്യങ്ങളും ഭംഗിയായി ചെയ്യാൻ കഴിയുകയുള്ളു.

നമ്മളിൽ പലർക്കുമുള്ള വേദന, നാളുകളായി കിട്ടിക്കൊണ്ടിരുന്ന സ്വാതന്ത്ര്യം നഷ്ടപ്പെടുമ്പോഴാണ്. ഇന്നലെകളിൽ പല കാര്യത്തിലും നമ്മൾക്ക് കിട്ടിയ സ്വാതന്ത്ര്യം നമ്മൾക്ക് ഇന്ന് ഉണ്ടാവണമെന്നില്ല.

നമ്മൾക്കുള്ള സ്വാതന്ത്ര്യം ഒരു പരിധിവരെയാണ് പല കാര്യത്തിലും കിട്ടുകയുള്ളു.

ഒരു വസ്തു ഉപയോഗിക്കാൻ അതിന്റെ ഉടമക്കാണ് സ്വാതന്ത്ര്യമുള്ളത്. ആ വസ്തു മറ്റൊരാൾക്ക്‌ നൽകുന്നതിലൂടെ ആ വ്യക്തിക്ക് ആ വസ്തുവിലുള്ള സ്വാതന്ത്ര്യം സ്വഭാവികമായി നഷ്ടപ്പെടുകയാണ് ചെയ്യുന്നത്.

പണത്തിന്റെ ആവശ്യകതക്കായി നമ്മൾക്ക് വേണ്ടപ്പെട്ട പലതും മറ്റൊരാൾക്ക് വിൽക്കേണ്ടി വന്നേക്കാം. നാളിതുവരെയായി നഷ്ടപ്പെട്ടതിനെയൊർത്തുകൊണ്ട് വിഷമിച്ചിരിക്കാതെ മുന്നേറാൻ, നേട്ടങ്ങൾക്കായി പരിശ്രമിക്കാൻ നമ്മൾ ഓരോരുത്തർക്കും ഇനിയെങ്കിലും കഴിയേണ്ടതുണ്ട്.

മറ്റുള്ളവരുടെ വ്യക്തി സ്വാതന്ത്ര്യം നമ്മളായിട്ട് ഇല്ലാതാക്കരുത്. ഓരോ വ്യക്തികൾക്കും അവരവർ ജീവിക്കുന്ന രാജ്യം നിശ്ചിത കാര്യങ്ങളിൽ നിയമപ്രകാരം സ്വാതന്ത്ര്യം അനുവദിക്കുന്നുണ്ട്, അതു ഒരാൾക്കും നിഷേധിക്കാൻ അവകാശമില്ല.

നമ്മൾക്കു നിയമപ്രകാരം കിട്ടിയ സ്വാതന്ത്ര്യത്തെ ഒരു കാരണവശാലും ദുർവിനിയോഗം ചെയ്യാതിരിക്കുവാൻ ശ്രദ്ധിക്കുക.

ഓരോ വ്യക്തികൾക്കും അവരവരുടേതായ സ്വാതന്ത്ര്യമുണ്ടെന്നുള്ള ഉത്തമബോധ്യം ഉണ്ടാവാനും, ഓരോ വ്യക്തികൾക്കും അവരവരുടേതായ സ്വാതന്ത്ര്യം നൽകാനും നമ്മൾ ഓരോരുത്തർക്കും ഇനിയുള്ള നാളുകളിൽ കഴിയട്ടെ.