ഉണർവിൻ പൊൻകിരണങ്ങൾ:The awakening golden rays-149

എന്തുകാര്യത്തിനും തുടക്കം ഉണ്ടാവേണ്ടതുണ്ടല്ലോ.

എല്ലാവരും അവരവരുടെ ജീവിതത്തിൽ നല്ലൊരു തുടക്കം ഉണ്ടാവാനാണ് ആഗ്രഹിക്കുക.

പഠനമേഖലയിൽ, തൊഴിൽമേഖലയിൽ, ബിസിനസ്‌ മേഖലയിൽ, കുടുംബജീവിതത്തിൽ അങ്ങനെ പലയിടത്തായി നമ്മളൊക്കെ പലപ്പോഴും തുടക്കം കുറിക്കാറുണ്ട്.

ഗംഭീരമായി തുടക്കം കുറിക്കുന്ന പലതും ഒരുപക്ഷെ അധികം ആയുസ്സ് ഉണ്ടാവാറില്ല, അതിനു പിന്നിൽ പല കാരണങ്ങളും കാണും.

ജീവിതത്തിൽ മാറ്റങ്ങൾ വേണമെങ്കിൽ നല്ലൊരു തുടക്കം ആവശ്യമാണ്.

ജീവിതത്തിൽ പലപ്പോഴും നമ്മൾ തുടക്കമിട്ട പല കാര്യങ്ങളിലും പരാജയപ്പെട്ടുപോകാറുണ്ട്,പരാജയത്തിൽ നിരാശപ്പെട്ടു സമയം പാഴാക്കാതെ തന്നെകൊണ്ട് ഇനിയെന്തെല്ലാം ചെയ്യാൻ കഴിയും എന്ന് കണ്ടെത്തുക.

ഒരു മല കയറാൻ ആഗ്രഹിക്കുന്ന വ്യക്തി ഒരു കാൽ മുന്നോട്ടു വെക്കാതെ സാധിക്കില്ലല്ലോ.

മറ്റുള്ളവർ കളിയാക്കും, വിമർശിക്കും, കുറ്റപ്പെടുത്തും എന്നൊക്കെ വിചാരിച്ചിരുന്നാൽ നമ്മൾക്ക് ആർക്കും ഒരു കാര്യത്തിലും ഒരുപക്ഷെ നല്ലൊരു തുടക്കം കുറിക്കാൻ കഴിഞ്ഞെന്നു വരില്ല.

റോഡിൽ മരം വട്ടം വീണുകിടന്നു റോഡിലെ ഗതാഗതം തടസ്സപ്പെട്ടപ്പോൾ എല്ലാവരും അതുനോക്കി നിൽക്കുകയാണ് ചെയ്തത്, എന്നാൽ അവിടെ വന്ന ഒരു കൊച്ചുകുട്ടി ആ മരം അവിടെ നിന്നും മാറ്റാൻ തന്റെതായ ശ്രമം നടത്തി, ഒടുവിൽ മറ്റുള്ളവരും ആ കുട്ടിയുടെ കൂടെ മരം മാറ്റാൻ സഹായത്തിനു നിന്നു, ഒടുവിൽ ഒത്തിരി പേരുടെ പരിശ്രമംകൊണ്ട് മരം റോഡിൽ നിന്നും നിക്കി, ആ കുട്ടി തുടക്കം കുറിച്ചില്ല എങ്കിൽ ഒരുപക്ഷെ ഒരുപാട് സമയം കൂടി റോഡ് ഗതാഗതം തടസ്സപ്പെട്ടു കിടന്നേനെ.അവിടെ കൂടി നിന്ന ആളുകളുടെ മനസ്സിനെ സ്വാധിനിക്കാൻ ആ കൊച്ചുകുട്ടിക്ക് കഴിഞ്ഞു.

പലപ്പോഴും മുൻപോട്ട് പോകുന്നതിൽ തടസ്സം ആയിട്ടുള്ളത് നമ്മൾ തന്നെയാണ്, നമ്മുടെ തെറ്റായ, നെഗറ്റീവ് ആയിട്ടുള്ള ചിന്തകളാണ്. നമ്മുടെ മനസ്സ് നമ്മളോട് ഒരുപക്ഷെ പറയാൻ ശ്രമിക്കും ഇപ്പോൾ കിട്ടിക്കൊണ്ടിരിക്കുന്ന സുഖപ്രദമായ അവസ്ഥകൾ നഷ്ടപ്പെടുത്തണ്ട എന്നൊക്കെ.

കഷ്ടപ്പെട്ട് വിജയം നേടിയെടുത്ത ഒരുപാട് ആളുകൾ, അവർ ഒരുപക്ഷെ മടി വിചാരിച്ചിരുന്നു എങ്കിൽ നേട്ടങ്ങൾ നേടിയെടുക്കാൻ കഴിയുമായിരുന്നില്ല.

ഒരു ചെടി വളർന്നു വൻ വൃക്ഷമായി ഫലങ്ങൾ ഉണ്ടാവണമെങ്കിൽ ആദ്യം തന്നെ ചെടി മണ്ണിൽ നടേണ്ടതുണ്ട്, പിന്നീട് ചെടിക്കു വളരാൻ വേണ്ട സാഹചര്യം ഒരുക്കേണ്ടതുണ്ട്.ചെടി നടാതെ ഫലം വേണം എന്ന് വാശിപിടിച്ചിട്ടു കാര്യം ഇല്ലല്ലോ.

എന്തുകാര്യത്തിലും തുടക്കം കുറിക്കാൻ എളുപ്പം ആയിരിക്കും, അതു നിലനിർത്തി കൊണ്ടുപോകാനാണ് കഷ്ടപ്പാട്.

ജീവിതത്തിൽ നമ്മൾ നേടാൻ ആഗ്രഹിക്കുന്ന നല്ല ലക്ഷ്യങ്ങൾക്കായി തുടക്കം കുറിക്കാൻ, ലക്ഷ്യം നേടുന്നതുവരെ പരിശ്രമിക്കാൻ എല്ലാവർക്കും സാധിക്കട്ടെ