ഉണർവിൻ പൊൻകിരണങ്ങൾ:The awakening golden rays-255

നമ്മൾ എന്തിനാണ് പ്രാധാന്യം കൊടുക്കുന്നത് എന്നത് വളരെ പ്രധാനപ്പെട്ടതാണ്.

നമ്മളുടെ മനസ്സിലേക്ക് പല തരത്തിലുള്ള ചിന്തകൾ കടന്നുവരാറുണ്ട്, അതിൽ പ്രാധാന്യം കൊടുക്കുന്ന ചിന്തകൾ ആയിരിക്കും നമ്മുടെ ജീവിതത്തിൽ പ്രവർത്തികൾ ആയിട്ടു മാറുക.

നല്ല ചിന്തകൾക്കും, നല്ല പ്രവർത്തികൾക്കും വേണ്ട പ്രാധാന്യം നൽകാൻ സാധിക്കേണ്ടതുണ്ട്.

വേണ്ടപ്പെട്ട പല കാര്യങ്ങൾക്കും നമ്മൾ പലപ്പോഴും പ്രാധാന്യം നൽകാറില്ല. പലപ്പോഴും നഷ്ടം സംഭവിച്ചു കഴിയുമ്പോൾ മാത്രമാണ് എത്രത്തോളം പ്രാധാന്യം ഉള്ളതാണെന്ന് തിരിച്ചറിയുക.

നമ്മളുടെ വിലപ്പെട്ട സമയത്തിന് നമ്മൾ വളരെയേറെ പ്രാധാന്യം നൽകേണ്ടതുണ്ട്.

നഷ്ടപ്പെട്ട സമയം നമ്മൾക്ക് ഒരിക്കലും തിരിച്ചു കിട്ടുകയില്ല എന്നത് എപ്പോഴും ഓർമ്മയിൽ ഉണ്ടാവണം.

നമ്മുടെ ആരോഗ്യത്തിന് വേണ്ട പ്രാധാന്യം നൽകിയില്ലെങ്കിൽ എത്ര സമ്പത്തു നേടിയാലും അതുകൊണ്ടൊന്നും ഒരുപക്ഷെ നഷ്ടപ്പെട്ട ആരോഗ്യം ഒരു പരിധിയിൽ കൂടുതൽ തിരിച്ചു കിട്ടിയെന്ന് വരില്ല.

ആരോഗ്യത്തിന് പ്രാധാന്യം നൽകുന്നതുപോലെ തന്നെ വളരെ പ്രധാനപ്പെട്ടതാണ് ആരോഗ്യത്തെ നശിപ്പിക്കുന്ന കാര്യങ്ങൾ ഉപേക്ഷിക്കാൻ തയ്യാറാവേണ്ടതിനും വേണ്ടതുപോലെ പ്രാധാന്യം കൊടുക്കേണ്ടതും.

ഈ ലോകത്തിലുള്ള എല്ലാം മനുഷ്യരുടെയും ജീവൻ നിലനിർത്തുന്നത് ഭക്ഷണമാണ്. ഓരോ മനുഷ്യജീവനും വിലപ്പെട്ടതാണ്.അപകടത്തിൽ പെടുന്ന നമ്മുടെ ചുറ്റിലുമുള്ള മനുഷ്യരുടെ ജീവൻ രക്ഷിക്കാനുള്ള ശ്രമം നമ്മളുടെ ഭാഗത്തുനിന്നും ഉണ്ടാവണം.

നമ്മുടെ ജീവനു നമ്മൾ എത്രത്തോളം പ്രാധാന്യം നൽകുന്നുവോ അത്രത്തോളം തന്നെ പ്രധാനപ്പെട്ടതാണ് മറ്റുള്ളവരുടെ ജീവൻ സുരക്ഷിതമാക്കുക എന്നതും. നമ്മുടെ അശ്രദ്ധ കൊണ്ട് ഒരിക്കലും റോഡിൽ മറ്റൊരാളുടെ ജീവനു അപകടം ഉണ്ടാവാതിരിക്കാൻ വളരെയേറെ സുരക്ഷിതമായി മാത്രം വാഹനം ഓടിക്കുവാൻ ശ്രദ്ധിക്കുക.

ഭക്ഷണത്തിന് പ്രാധാന്യം നൽകേണ്ടതുണ്ട്, നമ്മുടെ ചുറ്റിലും നിരവധി ആളുകൾ പട്ടിണിയിൽ കഴിയുന്നുണ്ട്, അതുകൊണ്ട് ദയവായി ആരും ഭക്ഷണം പാഴാക്കാതിരിക്കുക.

വിദ്യാഭ്യാസത്തിന് പ്രാധാന്യം നൽകേണ്ടതുണ്ട്. ഓരോ കാര്യങ്ങളും നമ്മൾക്ക് മനസ്സിലാകണം എങ്കിൽ അക്ഷരങ്ങൾ തിരിച്ചറിയാൻ പഠിക്കേണ്ടതുണ്ട്. സാമ്പത്തികം കൈകാര്യം ചെയ്യാൻ കണക്ക് അറിഞ്ഞിരിക്കേണ്ടതുണ്ട്. ആളുകളുമായി ആശയവിനിമയം ചെയ്യാൻ ഭാഷകൾ പഠിക്കേണ്ടതുണ്ട്.

നമ്മൾക്കു ആവശ്യമായ കാര്യങ്ങൾക്ക് വേണ്ട പ്രാധാന്യം നൽകാനും അനാവശ്യ കാര്യങ്ങൾക്ക് പ്രാധാന്യം നൽകാതിരിക്കാനും നമ്മൾ ഓരോരുത്തർക്കും സാധിക്കട്ടെ.