ഉണർവിൻ പൊൻകിരണങ്ങൾ:The awakening golden rays-260

ബഹുമാനം നൽകേണ്ടിടത്തു ബഹുമാനം നൽകാൻ പഠിക്കണം.

മറ്റുള്ളവർ ചെയ്യുന്ന പ്രവർത്തികൾ വിലയിരുത്തിയിട്ടാണ് നമ്മളിൽ പലർക്കും ആ വ്യക്തിയോട് ബഹുമാനം തോന്നുക.

ചില സാഹചര്യത്തിൽ എത്ര നല്ല പ്രവർത്തികൾ ചെയ്താലും ആ വ്യക്തികൾക്ക് വേണ്ടതുപോലെ ബഹുമാനം കിട്ടിക്കൊള്ളണം എന്നില്ല.

ആരിൽ നിന്നും പിടിച്ചു വാങ്ങിക്കാൻ കഴിയുന്ന ഒന്നല്ലല്ലോ ബഹുമാനം എന്ന് പറയുക.

പ്രവർത്തികൾ വിലയിരുത്തി മാത്രമേ നമ്മളിൽ പലർക്കും മറ്റുള്ളവർക്ക് ബഹുമാനം നൽകാൻ സാധിക്കാറുള്ളു.

ഓരോ സ്ഥാനമാനങ്ങളിൽ ഇരിക്കുന്നവർക്ക് പലപ്പോഴും ആ സ്ഥാനത്തിരിക്കുന്നതിന്റെ പേരിൽ ബഹുമാനം കിട്ടിയെന്ന് വന്നേക്കാം.

പലരും ഒരുപക്ഷെ പറയുക ബഹുമാനിച്ചില്ലെങ്കിലും കുഴപ്പമില്ല നിന്ദിക്കാതിരുന്നാൽ മതിയെന്നാണ്.

നമ്മളെക്കാൾ മുതിർന്ന വ്യക്തികളെ കാണുമ്പോൾ അവരെ ബഹുമാനിക്കണം എന്ന് ചെറുപ്പം മുതലേ നമ്മളെ മുതിർന്നവർ പറഞ്ഞു പഠിപ്പിക്കാറുണ്ട്.

ആരെ ബഹുമാനിക്കണം ആരെ ബഹുമാനിക്കണ്ട എന്നതൊക്കെ ഓരൊരുത്തരുടെയും വ്യക്തിപരമായ താല്പര്യം ആണല്ലോ.

എത്ര വലിയൊരു സ്ഥാനത്ത് ആയിരുന്നാൽ കൂടിയും മോശമായ പ്രവർത്തികളാണ് ചെയ്യുന്നതെങ്കിൽ കിട്ടിക്കൊണ്ടിരുന്ന ബഹുമാനം എല്ലാം തന്നെ നിമിഷനേരംകൊണ്ടു ഇല്ലാതെ ആയേക്കാം.

മറ്റുള്ളവരിൽ നിന്നും നമ്മൾക്ക് കിട്ടിക്കൊണ്ടിരുന്ന ബഹുമാനം നഷ്ടപ്പെട്ടിട്ടുണ്ടെങ്കിൽ അതിനെല്ലാം തക്കതായ കാരണങ്ങൾ ഉണ്ടാകാം.

മറ്റുള്ളവർ നമ്മളെ വേണ്ടതുപോലെ ബഹുമാനിച്ചില്ല എന്ന് കരുതി അതിന്റെപേരിൽ തളരാനോ നിരാശപ്പെടാനോ പാടില്ല.

മറ്റുള്ളവരിൽ നിന്നും ബഹുമാനം നേടിയെടുക്കാൻ വേണ്ടിയാകരുത് നമ്മുടെ പ്രവർത്തികൾ.

ആരും നമ്മളെ ബഹുമാനിച്ചില്ലെങ്കിലും നമ്മളെ തന്നെ സ്വയം ബഹുമാനിക്കാൻ പഠിക്കുക.

വീശിഷ്ട വ്യക്തികൾ മരിച്ചു കഴിയുമ്പോൾ ബഹുമാനസുചകമായി പല കാര്യങ്ങളും ആ വ്യക്തികളുടെ മരണശേഷം വേണ്ടപ്പെട്ടവർ ചെയ്യാറുണ്ടല്ലോ.

ജീവിച്ചിരിക്കുമ്പോൾ മറ്റുള്ളവർക്ക് വേണ്ട ബഹുമാനം കൊടുക്കുക. മനുഷ്യരാണ് പല കാര്യത്തിലും പരിമിതികൾ ഉള്ളവരാണ്, അതു തിരിച്ചറിഞ്ഞു ബഹുമാനിക്കാൻ പഠിക്കുക.

അർഹമായ ബഹുമാനം നൽകുന്നതുവഴി മറ്റുള്ളവർക്ക് മുന്നോട്ടു പോകുവാൻ കൂടുതൽ പ്രചോദനം കിട്ടുന്നു.

നമ്മൾ മറ്റൊരാളെ ബഹുമാനിക്കുന്നത് കണ്ടാണ് നമ്മുടെ പിൻതലമുറയും മറ്റുള്ളവരെ ബഹുമാനിക്കേണ്ടതിന്റെ ആവശ്യകത ഒരുപക്ഷെ മനസിലാക്കുക.

അർഹതപ്പെട്ടവർക്ക്  വേണ്ടതുപോലെ ബഹുമാനം നൽകാൻ നമ്മൾ ഓരോരുത്തർക്കും സാധിക്കട്ടെ.