ഉണർവിൻ പൊൻകിരണങ്ങൾ:The awakening golden rays-267

നമ്മളിൽ പലർക്കും ഭാവിയെപ്പറ്റി ആകുലതകൾ ഒരുപാട് ഉണ്ടാവാം, ഭാവി എന്നത് നമ്മുടെ ആരുടെയും കയ്യിൽ നിൽക്കുന്ന കാര്യമല്ല.

ഒത്തിരി പ്രതീക്ഷകളോടെ നാളെകൾ കാത്തിരിക്കുന്നവർക്ക് അപ്രതീക്ഷിതമായി പലതും നേരിടേണ്ടി വന്നേക്കാം.

ജീവിതത്തിൽ നാളെകൾ എന്തുസംഭവിക്കുമെന്ന് ആർക്കും മുൻകൂട്ടി പറഞ്ഞു തരാൻ കഴിയില്ല.

ആകുലതകൾ ഒഴിവാക്കികൊണ്ട് ഊർജസ്വലതയോടെ നല്ല ലക്ഷ്യത്തിനുവേണ്ടി പ്രവർത്തിക്കുക മാത്രമാണ് നമ്മൾക്ക് ചെയ്യാൻ കഴിയുക.

ഭാവിയെപ്പറ്റിയുള്ള ആകുലതകൾ അമിതമായാൽ നമ്മുടെ ഇന്നിന്റെ പ്രവർത്തനങ്ങളെ ഒരുപക്ഷെ സാരമായി തന്നെ ബാധിച്ചേക്കാം.

നമ്മൾ എന്നെങ്കിലും ഒരിക്കൽ ഈ ലോകത്തിൽ നിന്നും കടന്നുപോകേണ്ടവരാണ്. ജനിച്ച എല്ലാവരും ഒരു നാൾ മരിക്കും. മരണത്തെപ്പറ്റി ആകുലതപ്പെട്ടതുകൊണ്ട് മരണം ഒരിക്കലും നമ്മളിൽ നിന്നും അകലുകയില്ലല്ലോ.

എത്രയൊക്കെ സങ്കടങ്ങളും, ദുരിതങ്ങളും, തോൽവികളും നമ്മൾക്ക് ഉണ്ടെങ്കിൽ പോലും നല്ലൊരു ഭാവി ഉണ്ടാകുമെന്നുള്ള പ്രതീക്ഷയിൽ ഭാവിയെപ്പറ്റിയുള്ള അനാവശ്യ ആകുലതകൾ ഒഴിവാക്കി, നേട്ടത്തിനായി പരിശ്രമിച്ചുകൊണ്ട് മുന്നോട്ടു പോകുവാൻ കഴിയട്ടെ.

ആകുലതകളെ ശരിയായ വിധത്തിൽ കൈകാര്യം ചെയ്യാൻ കഴിയേണ്ടതുണ്ട്. അനാവശ്യ ആകുലതകൾ ഒഴിവാക്കാൻ വളരെയേറെ ശ്രദ്ധിക്കുക.

പരിധിവിട്ടുള്ള ആകുലതകൾ നമ്മുടെ ശാരീരിക, മാനസിക ആരോഗ്യത്തെയൊക്കെ മോശമായി ബാധിക്കാനിടയുണ്ട്, ആയതുകൊണ്ട് ഉള്ള നിമിഷത്തിൽ സന്തോഷത്തോടെ വലിയ ലക്ഷ്യം മുന്നിൽ കണ്ടു പരിശ്രമിക്കാൻ സാധിക്കട്ടെ.