ഉണർവിൻ പൊൻകിരണങ്ങൾ:The awakening golden rays-73

ജീവിതത്തിൽ നഷ്ടങ്ങൾ അനുഭവിക്കാത്തവരായി ആരും തന്നെ ഉണ്ടാകില്ല.

എല്ലാം നഷ്ടപ്പെട്ട അവസ്ഥയിൽ ആയിരിക്കുന്ന എത്രയോ മനുഷ്യരാണ് നമ്മൾക്കിടയിലുള്ളത്.

നഷ്ടങ്ങളിൽ നിന്നും കരകയറാൻ കഠിന പരിശ്രമം തന്നെ ഒരുപക്ഷെ നമ്മൾക്കൊക്കെ വേണ്ടി വന്നേക്കാം.

നാളെകളെക്കുറിച്ചുള്ള പ്രതീക്ഷകളിലാണ് ഒരുപക്ഷെ നമ്മൾ ഓരോരുത്തരും ഇന്നിപ്പോൾ ജീവിതം മുന്നോട്ടു തള്ളിനിക്കുന്നത്.

നഷ്ടങ്ങൾ ഒത്തിരി ജീവിതത്തിൽ ഉണ്ടായിട്ടും അതിലൊന്നും തളരാതെ പ്രതിസന്ധികളെ അതിജീവിച്ചുകൊണ്ട് വിജയം വരിച്ചിട്ടുള്ള എത്രയെത്ര വ്യക്തികളാണ് നമ്മൾക്ക് ചുറ്റിലും ഉള്ളത്, അവർക്കൊക്കെ ജീവിതത്തിൽ വിജയം നേടാൻ കഴിഞ്ഞത് ദൃഢനിശ്ചയമായിരുന്നു.

നമ്മളൊക്കെ നേരിട്ടുകൊണ്ടിരിക്കുന്ന പരാജയം ഒന്നിന്റെയും അവസാനമല്ല,ഓരോ പരാജയവും വിജയത്തിന് മുന്നോടിയാണല്ലോ. പരാജയങ്ങൾക്കുള്ള കാരണങ്ങൾ കണ്ടെത്തി പരിഹരിച്ചുകൊണ്ട് നിരന്തരം മുന്നോട്ടു നിങ്ങാൻ പരിശ്രമിച്ചുകൊണ്ടിരിക്കുക.നിരന്തരപരിശ്രമം നമ്മളെ ഒരുനാൾ വിജയത്തിലെത്തിച്ചേക്കാം.

ഈ ലോകത്തിൽ ഒന്നും തന്നെ സ്ഥിരമല്ലല്ലോ.നിശ്ചിത കാല പരിധി കഴിഞ്ഞാൽ നമ്മളിൽ നിന്നും എല്ലാം തന്നെ ഒരുപക്ഷെ നഷ്ടപ്പെട്ടേക്കാം. നമ്മളൊക്കെ ഈ ലോകത്തേക്ക് വെറും കയ്യോടെ വരുന്നു വെറും കയ്യോടെ തിരികെ പോകുന്നു, അതിനിടയിലുള്ള കൊച്ചു ജീവിതം മാത്രമാണ് ഈ ലോകത്തുള്ളത്.

ഉള്ളതിൽ സന്തോഷിക്കാൻ, ഉള്ളതുപോലെ ജീവിതത്തെ മുന്നോട്ടു കൊണ്ടുപോകുവാൻ എല്ലാവർക്കും കഴിയട്ടെ. ഇപ്പോഴത്തെ അവസ്ഥകൾക്ക് മാറ്റം ഉണ്ടാവാൻ അക്ഷിണം പരിശ്രമിക്കാൻ നമ്മൾ എല്ലാവർക്കും കഴിയട്ടെ.

നമ്മുടെ ആരോഗ്യം, സൗന്ദര്യം, സമ്പാദ്യം, വസ്തുവകകൾ, ജോലി, അധികാരം, കഴിവ്, ഓർമ്മ, ബുദ്ധി എല്ലാം ഏതു നിമിഷവും നഷ്ടപ്പെട്ടേക്കാം, അതിലൊന്നും അഹങ്കരിക്കാതിരിക്കുക.

ഒഴിവാക്കാമായിരുന്ന പല നഷ്ടപ്പെടലുകൾക്കും കാരണം മുന്നറിയിപ്പുകൾക്ക് വേണ്ടത്ര പരിഗണന കൊടുക്കാത്തതുകൊണ്ടാണ്.

നഷ്ടപ്പെടലുകൾ ജീവിതത്തിൽ നിന്നും ഒരു പരിധിവരെയെങ്കിലും ഒഴിവാക്കാൻ മുന്നോട്ടു ചെയ്യുന്ന ഓരോ കാര്യത്തിലും ഇനിയെങ്കിലും അതീവ ജാഗ്രത പാലിക്കേണ്ടതുണ്ട്.

മനുഷ്യത്വം നഷ്ടപ്പെടാതിരിക്കാൻ വളരെയേറെ ശ്രദ്ധിക്കുക.

ചുറ്റിലുമുള്ള മനുഷ്യരെ സഹജീവികളായി കണ്ടുകൊണ്ട് മുന്നോട്ടു പോകുവാൻ കഴിയട്ടെ.

നഷ്ടപ്പെടലുകൾ എല്ലാവരുടെയും ജീവിതത്തിൽ ഉണ്ടാകും അതെല്ലാം ധിരതയോടെ നേരിടാൻ നമ്മൾക്ക് എല്ലാവർക്കും കഴിയട്ടെ.

പ്രകൃതിദുരന്തം മൂലം എത്രയോ ആളുകളാണ് അവർക്ക് സ്വന്തം ആയതെല്ലാം നഷ്ടപ്പെട്ടു മറ്റിടങ്ങളിലേക്ക് യാത്രയാകേണ്ടി വന്നിട്ടുള്ളത്.

നഷ്ടപ്പെടലിന്റെ വേദന നഷ്ടപ്പെട്ടവർക്കേ അറിയുള്ളു.ശരിയായ തിരിച്ചറിവ് ഉണ്ടായിരുന്നെങ്കിൽ പല നഷ്ടപ്പെടലുകളും ഒരുപക്ഷെ ഒരുപരിധി വരെയെങ്കിലും ഒഴിവാക്കാമായിരുന്നു.

ഓരോ നഷ്ടപ്പെടലുകളിൽ നിന്നും ആവശ്യമായ തിരിച്ചറിവ് നേടി മുന്നോട്ടുള്ള ജീവിതത്തിൽ നേട്ടങ്ങൾ സ്വന്തമാക്കാൻ കഴിയട്ടെ.

നഷ്ടപ്പെടലുകളിൽ നിന്നും ജീവിതത്തിലേക്ക് തിരികെ വരാൻ നമ്മൾക്ക് പോസിറ്റീവ് ചിന്ത ഉണ്ടാവേണ്ടത് വളരെ ആവശ്യമാണ്.നമ്മൾക്ക് ഇനിയും നേട്ടങ്ങൾ നേടിയെടുക്കാൻ കഴിയുമെന്ന് ഉറച്ചു വിശ്വസിക്കുക, അതിനായി അലസതകൂടാതെ ശ്രമിച്ചുകൊണ്ടിരിക്കുക.

നമ്മൾക്കു ഈ ലോകത്തുനിന്നും എന്തുതന്നെ നഷ്ടപ്പെട്ടാലും ആത്മവിശ്വാസം ഉണ്ടെങ്കിൽ മുന്നോട്ട് നടക്കാനുള്ള വഴികൾ തെളിഞ്ഞു വന്നേക്കാം.

നിരന്തരമായ പരിശ്രമം ഉണ്ടെങ്കിൽ ഏതു ദുരിതസാഹചര്യത്തിൽ നിന്നും കരകയറാമെന്ന് നമ്മുടെ ചുറ്റുപാടുമുള്ള ഒരുപാട് മനുഷ്യരുടെ ജീവിതത്തിലൂടെ കാണിച്ചുതന്നിട്ടുണ്ട്.

നമ്മൾ നേരിട്ടുകൊണ്ടിരിക്കുന്ന നഷ്ടങ്ങളെ ശരിയായ വിധത്തിൽ കൈകാര്യം ചെയ്യേണ്ടതുണ്ട്.

ഏതൊരു വ്യക്തിക്കും നഷ്ടങ്ങൾ സഹിക്കാവുന്നതിലും അപ്പുറം ആണെങ്കിൽ കൂടിയും അവയെല്ലാം ശരിയായ വിധത്തിൽ തന്നെ കൈകാര്യം ചെയ്തില്ല എന്നുണ്ടെങ്കിൽ വലിയൊരു ദുരിതം ആയിരിക്കും ഒരുപക്ഷെ സംഭവിക്കുക.

ഏതൊരു ദുഃഖം ആയാൽ പോലും കാലം മുന്നോട്ടു പോകുന്നതനുസരിച്ചു ദുഃഖത്തിന്റെ കാഠിന്യത്തിൽ വ്യത്യാസം വന്നേക്കാം.

എല്ലാ സങ്കടങ്ങളും എളുപ്പം നമ്മളെ വിട്ടുപോകില്ല, എല്ലാത്തിനും അതിന്റെതായ സമയം ആവശ്യമാണ്.

ചില നഷ്ടപ്പെടലുകൾ നമ്മൾക്ക് തിരിച്ചറിവ് നേടിതരാനുള്ളതാണ്. ചില നഷ്ടപ്പെടലുകൾ അതിനേക്കാൾ ഉയർന്നത് നേടിയെടുക്കാനുള്ള ശ്രമത്തിനുവേണ്ടിയുള്ളതാണ്.

ഇന്നലെകളിലെ നഷ്ടപ്പെടലുകൾ മാത്രം ഓർത്തിരുന്നാൽ, നമ്മളാർക്കും തന്നെ ഇന്നിൽ ജീവിക്കാനോ, ഒന്നും നേടിയെടുക്കാനോ  കഴിയണമെന്നില്ല.

ചില നഷ്ടപ്പെടലുകൾ തടയാൻ മനുഷ്യർക്ക് ആർക്കും തന്നെ ഒരുപക്ഷെ സാധിച്ചെന്ന് വരില്ല. പ്രകൃതി ദുരന്തത്തെ നേരിടാൻ മനുഷ്യർക്ക് ഒത്തിരി പരിമിതികളുണ്ടല്ലോ.

നമ്മൾക്കും നമ്മുടെ ചുറ്റിലുമായി ഉണ്ടായിട്ടുള്ള നഷ്ടപ്പെടലുകളെ ശരിയായ വിധത്തിൽ നേരിടാൻ നമ്മൾ ഓരോരുത്തർക്കും ആത്മധൈര്യവും ആത്മവിശ്വാസവും നേടിയെടുക്കാൻ സാധിക്കട്ടെ.