ഉണർവിൻ പൊൻകിരണങ്ങൾ:The awakening golden rays-76

നമ്മൾക്ക് ഒത്തിരി കാര്യങ്ങൾ ഏറ്റവും സങ്കടകരം ആയിട്ട് തോന്നുന്നത് ഉണ്ടാകുമല്ലോ.

ആരും സഹായിക്കാൻ ഇല്ലാതെ, തിരിഞ്ഞു നോക്കാൻ ഇല്ലാത്ത സാഹചര്യത്തിൽ എല്ലാം നമ്മൾക്കൊക്കെ വളരെയേറെ വിഷമം നേരിടേണ്ടി വന്നിട്ടുണ്ടാവാം.

നമ്മുടെ ജീവിതത്തിൽ നാളെകൾ എങ്ങനെ ആയിരിക്കുമെന്ന് ആർക്കും കൃത്യമായി നമ്മളോട് പറയാൻ സാധിച്ചെന്നു വരില്ല.

നമ്മൾ ആഗ്രഹിക്കാത്ത പലതും നമ്മുടെയൊക്കെ ജീവിതത്തിൽ ഉണ്ടായേക്കാം. നഷ്ടങ്ങൾ നേരിടേണ്ടി വന്നേക്കാം, ദുരിതങ്ങൾ, ദുരന്തങ്ങൾ അനുഭവിക്കേണ്ടി വന്നേക്കാം അങ്ങനെ എത്രയെത്ര സാഹചര്യത്തിലൂടെയൊക്കെ നമ്മൾക്കൊക്കെ കടന്നുപോകേണ്ടി വന്നേക്കാം.

സ്വപ്നം സ്വന്തമാക്കാൻ കഴിയാതെ പോയാൽ, പണം, പദവി, ജോലി, ആരോഗ്യം, സുഖസൗകര്യം എല്ലാം നഷ്ടം ആയാൽ നമ്മൾക്കൊക്കെ സങ്കടം ഉണ്ടാവും.

പല സങ്കടങ്ങൾക്കും കാരണം നമ്മുടെ/മറ്റുള്ളവരുടെ ഭാഗത്തെ തെറ്റായ പ്രവർത്തികൾമൂലമാണ്.

നമ്മൾ ചെയ്യുന്ന ഓരോ കാര്യത്തിലും വേണ്ട കരുതൽ ഇല്ലെങ്കിൽ അതു ഒരുപക്ഷെ നാളെകളിൽ വലിയ അളവിൽ സങ്കടത്തിനു കാരണം ആയേക്കാം.

തമാശക്കുവേണ്ടി ചെയ്യുന്ന കാര്യങ്ങൾ ചിലരിലെങ്കിലും ഒരുപക്ഷെ വളരെയേറെ സങ്കടത്തിന് കാരണം ആയേക്കാം.

സങ്കടം ഉണ്ടാകുമ്പോൾ അതിനെ എങ്ങനെ ശരിയായ വിധത്തിൽ നേരിടാൻ സാധിക്കുമെന്ന് തിരിച്ചറിയണം.

ഏതു സങ്കടത്തിനു പിന്നിലും ഓരോരോ കാരണങ്ങൾ ഉണ്ടാകും, അതു മനസ്സിലാക്കി പരിഹരിച്ചാൽ മാത്രമേ സങ്കടത്തിന്റെ തോതു കുറയുകയുള്ളു.

ജോലി ഇല്ലാത്ത അവസ്ഥ, കളിയാക്കൽ നേരിടേണ്ടി വരുന്ന അവസ്ഥ, സ്വന്തം ആയി വീട് ഇല്ലാത്ത അവസ്ഥ അങ്ങനെ ഒരുപാട് കാരണങ്ങൾ ആവാം ഓരോ വ്യക്തികൾക്കും സങ്കടത്തിന് കാരണം.

നമ്മൾ നേരിടേണ്ടി വരുന്ന ഓരോ സങ്കടവും നമ്മളിൽ നിന്നും അകലാൻ അതിന്റെതായ സമയം ആവശ്യമാണ്. കാലം കഴിയുന്തോറും ദുഃഖത്തിന്റെ ത്രിവത കുറഞ്ഞുവരും. സങ്കടം ഉളവാക്കിയ സാഹചര്യം ആയിട്ട് പൊരുത്തപ്പെട്ടുപോകാൻ കഴിയുമ്പോൾ തന്നെ പതിയെ സങ്കടം നമ്മളിൽ നിന്നും അകലാൻ തുടങ്ങും.

പട്ടിണി കിടക്കുന്ന വ്യക്തിയുടെ സങ്കടം സുഭിക്ഷമായി ഭക്ഷണം കിട്ടുന്ന വ്യക്തിക്ക് മനസ്സിലാവണം എന്നില്ല.

നമ്മൾക്കു എത്ര സമ്പത്തു ഉണ്ടെന്ന് പറഞ്ഞാലും, സമ്പത്തുകൊണ്ട് നികത്താൻ ആകാത്ത ഒത്തിരി സങ്കടങ്ങൾ ഈ ലോകത്തുണ്ട്.

നമ്മളുടെ വേണ്ടപ്പെട്ടവരുടെ മരണം നമ്മളെ ഏറ്റവും കൂടുതൽ സങ്കടമാക്കുന്ന കാര്യമാണ്,ആ വ്യക്തിയുടെ കുറവ് മറ്റാരെയുംകൊണ്ടു നികത്താൻ കഴിയുന്നതല്ലല്ലോ.

നമ്മുടെ പൂർവികർ അനുഭവിച്ചിരുന്ന പല സങ്കടങ്ങളും തലമുറകൾ മാറി വന്നപ്പോൾ ഓരോരോ കണ്ടുപിടുത്തം വഴിയായി പരിഹാരം കണ്ടെത്തികൊണ്ട് വന്നു.

എല്ലാവരുടെയും സങ്കടങ്ങൾ നാളെകളിൽ എത്രയും പെട്ടെന്ന് തന്നെ അകലാൻ ഇടവരട്ടെ. ഏതു സങ്കടം ആയാലും അതിനെ ധിരമായി നേരിട്ട് മുന്നേറാൻ നമ്മൾ ഓരോരുത്തരും നിരന്തരം പരിശ്രമിക്കുക.