ഉണർവിൻ പൊൻകിരണങ്ങൾ:The awakening golden rays-116

മറ്റുള്ളവരെ കുറ്റപ്പെടുത്താൻ വളരെയധികം ഇഷ്ടപ്പെടുന്നവർ ഉണ്ടാകാം നമ്മൾക്കിടയിൽ.

സ്വന്തം കുറവുകൾ മറച്ചുവെക്കാൻ മറ്റുള്ളവരെ കുറ്റപ്പെടുത്തുന്നവരും ഉണ്ടാകാം.

ആവശ്യം ഇല്ലാതെയുള്ള, സത്യം തിരിച്ചറിയാതെയുള്ള കുറ്റപ്പെടുത്തലുകൾ കേൾക്കാനിടവരുന്ന വ്യക്തികൾക്കുണ്ടാകുന്ന വേദന എത്രത്തോളമാണെന്ന് നമ്മളിൽ പലരും ഒരുപക്ഷെ മനസ്സിലാക്കാതെ പോകുന്നു.

പല കാര്യത്തിലും മറ്റുള്ളവരെ കുറ്റപ്പെടുത്തി സംസാരിച്ചതുകൊണ്ട് നേട്ടങ്ങൾ/മാറ്റങ്ങൾ ഉണ്ടാവണം എന്നില്ലല്ലോ.

സ്ഥിരമായി കുറ്റപ്പെടുത്തലുകൾ മാത്രം ഒരാളിൽ നിന്നും കേൾക്കേണ്ടി വന്നാൽ ആ വ്യക്തിയിൽ നിന്നും ഒരുപക്ഷെ മറ്റുള്ളവർ അകന്നുപോയേക്കാം.

നമ്മൾ ചെയ്യാത്ത തെറ്റിന് പോലും ഒരുപക്ഷെ മറ്റുള്ളവരിൽ നിന്നും കുറ്റപ്പെടുത്തലുകൾ കേട്ടെന്ന് വരാം.

നമ്മളൊക്കെ മനുഷ്യരാണ് തെറ്റുകൾ പറ്റാം, കുറ്റവും കുറവുകളും ഉണ്ടാവാം, എത്രയോക്കെ കുറ്റപ്പെടുത്തലുകൾ നടത്തിയാലും, കേൾക്കേണ്ടി വന്നാലും ആവശ്യമായ മാറ്റങ്ങൾ ചെയ്യാൻ തയ്യാറാവാത്തരുമുണ്ടാകും.

മറ്റുള്ളവരിലേ നേട്ടങ്ങളെ, കഴിവുകളെ കണ്ടെത്തി അഭിനന്ദിക്കുന്നതിന് പകരം അവരിലെ കുറവുകൾ മാത്രം കണ്ടെത്തി കുറ്റപ്പെടുത്താൻ ശ്രമിക്കുന്നത് നല്ല കാര്യം അല്ലല്ലോ.

മറ്റുള്ളവരെ കുറ്റപ്പെടുത്തി സംസാരിക്കുമ്പോൾ ഒരു കാര്യം മനസ്സിലാക്കുക നമ്മളാരും എല്ലാം തികഞ്ഞവർ അല്ലായെന്ന്.

കുറ്റപ്പെടുത്തി മാത്രം സംസാരിക്കാതെ എങ്ങനെ കുറ്റത്തിന് ശരിയായ വിധത്തിൽ പരിഹാരം കണ്ടെത്താൻ കഴിയുമെന്നും മുന്നോട്ട് എങ്ങനെ നേരായ വഴിയിൽകൂടി സഞ്ചരിക്കാൻ കഴിയുമെന്നുമാണ് അന്വേഷിക്കേണ്ടത്.

കുറ്റങ്ങൾ ആവർത്തിച്ചാൽ ഒരുപക്ഷെ കുറ്റത്തിന്റെ ഗൗരവം മനസ്സിലാക്കാൻ അവരെ കുറ്റപ്പെടുത്തി സംസാരിക്കേണ്ടി വന്നേക്കാം.എന്തു കാര്യത്തിലായാലും പരിധിവിട്ടു കുറ്റപ്പെടുത്തി സംസാരിക്കാൻ ഇടവരരുത്.

പരിധിവിട്ട കുറ്റപ്പെടുത്തലുകൾ മനുഷ്യരെ മാനസികമായും ശാരീരികമായും ഒരുപക്ഷെ തളർത്തിയേക്കാം.

മറ്റുള്ളവരെ കുറ്റപ്പെടുത്തി മാത്രം സംസാരിക്കാനുള്ള സാഹചര്യം ഒഴിവാക്കാൻ നമ്മൾ ഏവർക്കും സാധിക്കട്ടെ.അനാവശ്യമായി കുറ്റങ്ങൾ മാത്രം സംസാരിക്കുന്നവരിൽ നിന്നും ആവശ്യമായ അകലം പാലിക്കുക.

കുറ്റങ്ങൾ ചെയ്യാതിരിക്കാനും കുറ്റപ്പെടുത്തലുകൾ കേൾക്കാതിരിക്കാനും നമ്മൾ ഓരോരുത്തർക്കും കഴിയട്ടെ.