ഉണർവിൻ പൊൻകിരണങ്ങൾ:The awakening golden rays-131

നമ്മുടെ ഓരോരുത്തരുടെയും വളർച്ചക്ക് ജോലി ആവശ്യമാണ്. വരുമാനം ലഭിക്കുന്ന ജോലികളും വരുമാനം ലഭിക്കാത്ത ജോലികളും ചെയ്യേണ്ടി വരും.നമ്മുടെ ശരീരത്തിലെ ഓരോ അവയവങ്ങളും അവയുടെ ജോലികൾ സമയബന്ധിതമായി ഭംഗിയായി നിർവഹിക്കുന്നതുകൊണ്ടാണ് നമ്മൾ ഓരോരുത്തരും മുന്നോട്ടു സഞ്ചരിക്കുന്നത്.

ഈ ലോകത്തിലേക്ക് കൺതുറന്നു നോക്കിയാൽ നിരവധി ജോലി സാധ്യതകൾ കാണാൻ കഴിയും, കാലം മാറുന്നത് അനുസരിച്ചു ചില ജോലികൾ തീർത്തും ഇല്ലാതെയാകുകയും പകരം പുതിയ ജോലികൾ സ്ഥാനം പിടിക്കുകയും ചെയ്തിട്ടുണ്ട്.പുതിയ ജോലിമേഖലകൾ കാലത്തിന് അനുസരിച്ചു കടന്നുവന്നുകൊണ്ടിരിക്കും.

വരുമാനം കിട്ടുന്ന ജോലി എല്ലാവർക്കും മുന്നോട്ട് ജീവിക്കാൻ ആവശ്യമാണ്.

വരുമാനം കിട്ടുവാൻ സ്വന്തം ആയിട്ടുള്ള ബിസിനസ്‌, ജോലി എന്തെങ്കിലും തിരഞ്ഞെടുക്കേണ്ടതായിട്ട് വരും.

എല്ലാ ജോലിയും എല്ലാവർക്കും ഇണങ്ങുന്നതല്ല. നമ്മൾക്ക് ഇണങ്ങുന്ന ജോലി കണ്ടെത്തുക. നമ്മൾ ചെയ്യുന്ന ഓരോ ജോലിയും അഭിമാനത്തോടെ ചെയ്യുക.

ജോലിയുള്ളവർ, ജോലി ഇല്ലാത്തവരെ പുച്ഛിക്കാതെയും കളിയാക്കാതെയും ഇരിക്കുക, കാരണം ജോലി ഇല്ലാത്ത അവസ്ഥ ഒരാളെ സംബന്ധിച്ച് വളരെയേറെ വിഷമം നൽകുന്ന കാര്യമാണ്.

നമ്മൾ ആഗ്രഹിച്ച ജോലി കിട്ടിയില്ലെങ്കിൽ ഈ ലോകത്തിൽ ഒന്നും നേടാൻ ആവില്ല എന്നുള്ള ചിന്ത ഒഴിവാക്കുക.ഏതൊരു ജോലിയും നേടിയെടുക്കാനും ജോലിയിൽ തുടർന്ന് പോകുവാനും കഷ്ടപ്പെടേണ്ടതായിട്ടുണ്ട്.

ഓരോ ജോലിക്കും അതിന്റെതായ കഷ്ടപ്പാടുണ്ട്, ആ കഷ്ടപ്പാടുകളെ നേരിട്ടാൽ മാത്രമേ മുന്നോട്ട് പോകുവാൻ സാധിക്കുകയുള്ളു.

ഏതൊരു ജോലിയും സുഗമമായി മുന്നോട്ട് പോകണമെങ്കിൽ അലസത ഉപേക്ഷിക്കേണ്ടതുണ്ട്. ഓരോ വ്യക്തികൾക്കും അവർ ചെയ്യുന്ന ജോലി നൽകുന്ന ഊർജം വളരെ വലുതാണ്.

ജോലി ഇല്ലാത്തതുകൊണ്ട് നിരാശപ്പെട്ടിരിക്കാതെ അവസരങ്ങൾ കണ്ടെത്തുക, ഒരുപക്ഷെ നമ്മളുടെ യോഗ്യതക്കു അനുസരിച്ചുള്ള ജോലി തുടക്കത്തിൽ ലഭിക്കണം എന്നില്ല, ഏതു ജോലി ചെയ്താലും അതിൽ പുരോഗതി നേടിയെടുക്കാൻ ശ്രമിച്ചുകൊണ്ടിരിക്കുക.

നമ്മളെ ഏൽപ്പിച്ച ജോലി ഭംഗിയായി നിർവഹിക്കാൻ നമ്മൾക്ക് ഉത്തരവാദിത്തമുണ്ട്, ജോലിയിൽ വിഴ്ച വരുത്തിയാൽ നമ്മൾക്കും നമ്മുടെ ചുറ്റിലുമുള്ള ജോലിയുമായി ബന്ധപ്പെട്ടവർക്കും ബുദ്ധിമുട്ട് ഉണ്ടാവും.

ഏതൊരു ജോലിക്കും അതിന്റെതായ മഹത്വമുണ്ട്.ആരെയും വിലയില്ലാത്തവരായി കാണാതിരിക്കുക.

നമ്മൾ ഭക്ഷിക്കുന്ന ഭക്ഷണപദാർത്ഥങ്ങൾ ഉണ്ടാവണമെങ്കിൽ കൃഷി ചെയ്യാൻ ആരെങ്കിലും തയ്യാറാവേണ്ടതുണ്ട്, കൃഷി ഉൽപ്പന്നം നമ്മുടെ കൈകളിലേക്ക് എത്തിച്ചേരാൻ ഒത്തിരി ആളുകളുടെ അധ്വാനം ആവശ്യമാണ്.

നമ്മൾ ഓരോരുത്തരും അഭിരുചിയുള്ള ജോലി കണ്ടെത്തുക. അഭിരുചിയുള്ള ജോലി ചെയ്യുമ്പോഴാണ് നമ്മളിൽ പലരും ഒരുപക്ഷെ സംതൃപ്തി നേടുക.

സാഹചര്യത്തിന് അനുസരിച്ചു നമ്മുടെ ജോലികൾ നഷ്ടപ്പെട്ടേക്കാം. ജോലി നഷ്ടപ്പെട്ടതിൽ നിരാശപ്പെട്ടിരിക്കാതെ പുതിയ ജോലി കണ്ടെത്താൻ ശ്രമിച്ചുകൊണ്ടിരിക്കുക.

ജോലിയിൽ തെറ്റുകൾ പറ്റാം, അതെല്ലാം തിരുത്തി മുന്നേറാൻ ശ്രമിച്ചുകൊണ്ടിരിക്കുക.

നമ്മുടെ ഓരോ സമയവും വിലപ്പെട്ടതാണെന്ന തിരിച്ചറിവിൽ ഓരോ നിമിഷവും ചിലവഴിക്കുക. സമയം വെറുതെ പാഴാക്കി കളയാതിരിക്കാൻ ശ്രമിക്കുക.

മറ്റുള്ളവർക്ക് ഉപദ്രവമല്ലാത്ത രീതിയിൽ നമ്മൾ ചെയ്യുന്ന ജോലി എന്തുമായികൊള്ളട്ടെ, അതിൽ ആത്മാർത്ഥത, സത്യസന്ധത, കൃത്യനിഷ്ഠ കൊണ്ടുവരാൻ ശ്രമിക്കുക.

കൂടുതൽ നേട്ടങ്ങൾക്കായി നിലവിലെ ജോലിയിൽ നിന്നും മാറ്റങ്ങൾ ആവശ്യമായി വന്നേക്കാം.പുതിയ ജോലി സാഹചര്യങ്ങളെ ക്ഷമയോടെ നേരിടാൻ തയ്യാറാകുക.

നമ്മളുടെ കഴിവിന് അനുസരിച്ചു കൂടുതൽ സമ്പാദ്യം, കൂടുതൽ സുഖസൗകര്യങ്ങൾ നേടാൻ കഴിയുന്ന ജോലി കണ്ടെത്തുക.

ഏതു മേഖലയിലും കാലഘട്ടത്തിനനുസരിച്ചു മാറ്റങ്ങൾ ആവശ്യമാണ്, അതെല്ലാം ശരിയായ വിധത്തിൽ ഉൾക്കൊണ്ട്‌ മുന്നോട്ട് പോകുവാൻ തയ്യാറാവുക. കാലഘട്ടത്തിനനുസരിച്ചു മാറ്റം വരുത്താൻ നമ്മൾ തയ്യാറായില്ല എങ്കിൽ ഒരുപക്ഷെ നമ്മൾ പലയിടത്തുനിന്നും പിന്തള്ളപ്പെട്ടുപോയേക്കാം.

നമ്മൾ ഓരോരുത്തരും ചെയ്യുന്ന ജോലി ഏത്ര ചെറുതായികൊള്ളട്ടെ അതിൽ അഭിമാനത്തോടെ, ആത്മാർത്ഥതയോടെ, സത്യസന്ധതയോടെ ചുറ്റിലുമുള്ളവർക്ക് ഉപകാരപ്രദമായ രീതിയിൽ ജോലി ചെയ്യാൻ സാധിക്കട്ടെ.