ഉണർവിൻ പൊൻകിരണങ്ങൾ:The awakening golden rays-132

ഈ ഭൂമിയിൽ ജനിച്ചു മരിച്ചു കടന്നുപോകുന്ന ഓരോ മനുഷ്യർക്കും ഈ ഭൂമിയിൽ ചെയ്തുതിർക്കാൻ ഒത്തിരി ജോലികളുണ്ട്.ഒരുപക്ഷെ നമ്മളിൽ ആർക്കും തന്നെ ഈ ലോകത്ത്, സാഹചര്യങ്ങളുടെ പരിമിതികൾ നിമിത്തം ആഗ്രഹിച്ച എല്ലാ ജോലികളും ഭംഗിയായി പൂർത്തിയാക്കാൻ സാധിച്ചെന്ന് വരില്ല.

നമ്മൾ ഓരോരുത്തരും ഇന്നിപ്പോൾ ചെയ്യുന്ന ജോലികളിൽ സംതൃപ്തി നേടുന്നവർ ആയിരിക്കില്ല ഒരുപക്ഷെ അതിനു ഓരോരുത്തർക്കും ഓരോരോ കാരണങ്ങൾ ഉണ്ടായിരിക്കും. സംതൃപ്തി നേടുന്ന ജോലികൾക്കായി നമ്മൾ നിരന്തരം ശ്രമിച്ചുകൊണ്ടിരിക്കണം, അല്ലെങ്കിൽ ചെയ്യുന്ന ജോലിയിൽ നേരായ വഴിക്കുള്ള സംതൃപ്തി കണ്ടെത്താനുള്ള മാർഗങ്ങൾ അന്വേഷിച്ചു കണ്ടെത്താൻ ശ്രമിക്കണം.

സാമ്പത്തിക, ഭൗതിക നേട്ടങ്ങളുമായി മുന്നോട്ടു പോകുവാൻ എന്തെങ്കിലും ജോലി എല്ലാവർക്കും ആവശ്യമാണ്.

എല്ലാവരും അവരവരുടെ ജോലികൾ ഭംഗിയായി നിർവഹിക്കുന്നതുകൊണ്ടാണ് ഈ ലോകം ഇത്രയും സുന്ദരമായി മുന്നോട്ട് പോകുന്നത്.

ചെയ്യേണ്ട ജോലികളിൽ വിഴ്ചവരുത്തുമ്പോഴാണ് ആ ജോലിയുടെ ഫലം അനുഭവിക്കേണ്ടവർക്ക് ബുദ്ധിമുട്ട് നേരിടേണ്ടി വരുന്നത്.

ഒത്തിരിയേറെ കഷ്ടപ്പെട്ടുകൊണ്ടാണ് പലരും അവരവരുടെ ജോലി നേടിയെടുക്കുന്നതും ജോലികൾ ചെയ്യുന്നതും.

ശരീരത്തിലെ ഓരോ അവയവങ്ങളും അവയുടെ ജോലികൾ ഭംഗിയായി നിർവഹിക്കുന്നതുകൊണ്ടാണ് നമ്മളൊക്കെ മുന്നോട്ട് പോയികൊണ്ടിരിക്കുന്നത്.

നമ്മളൊക്കെ ആരോഗ്യത്തോടെ, ഉണർവോടെ ആയിരിക്കുന്നിടത്തോളം കാലം നമ്മളെകൊണ്ട് ആകുന്നതുപോലെ മറ്റുള്ളവർക്ക് ഉപകാരപ്രദമാകുന്ന ജോലികൾ ചെയ്യുക.

നമ്മൾ ചെയ്യുന്ന ജോലികൾ എന്തുമായിക്കൊള്ളട്ടെ അതിന്റെ പേരിൽ പലരിൽ നിന്നും വേദനിപ്പിക്കുന്ന അനുഭവങ്ങൾ ഒരുപക്ഷെ നേരിടേണ്ടി വന്നേക്കാം, അതെല്ലാം ധൈര്യപൂർവം നേരിടുക.

ജോലികൾക്കിടയിൽ വെല്ലുവിളികൾ ധാരാളം നേരിടേണ്ടി വന്നേക്കാം, അതെല്ലാം നേരിടാൻ നമ്മൾക്ക് കഴിയട്ടെ.

ആഗ്രഹിച്ച ജോലി കിട്ടാതെ പോയതിൽ വിഷമിച്ചിരിക്കാതെ നമ്മുടെ കഴിവിന്റെ പരമാവധി ശ്രമിക്കുക.

പലരും ഓരോ ജോലികളും തിരഞ്ഞെടുക്കുന്നത് ആരും നിർബന്ധിച്ചുകൊണ്ടല്ല, പകരം ഈ ലോകത്തിനു അവരുടെ സേവനം ആവശ്യമാണെന്ന് കണ്ടുകൊണ്ടാണ്.

നമ്മളെകൊണ്ട് മാത്രം ചെയ്യാൻ കഴിയുന്ന ഒത്തിരി ജോലികൾ ഈ ലോകത്തുണ്ട്, അതു നിർവഹിക്കാൻ നമ്മൾക്ക് മാത്രമേ കഴിയുള്ളു.

നമ്മുടെ ഓരോ ജോലിയും മറ്റുള്ളവരുടെ ജീവിതത്തിൽ നല്ല മാറ്റങ്ങൾക്ക് കാരണം ആയിതീരട്ടെ.

ചില ജോലികൾക്ക് നമ്മൾക്ക് തുടക്കം കാര്യമായ പ്രതിഫലം ലഭിക്കണം എന്നില്ല, ആ ജോലിയിൽ വേണ്ടത്ര അറിവും പരിശീലനവും നേടിയെടുക്കുകയാണ്, ആ ജോലിയെ തിരഞ്ഞെടുക്കാൻ ഇഷ്ടപ്പെടുന്നവർ തുടക്കസമയത്തു ചെയ്യേണ്ടത്.

ഏത് ജോലിയായാലും നിരന്തരം പഠിക്കാൻ ശ്രമിച്ചുകൊണ്ടിരിക്കുക, ചെയ്യുന്ന ജോലിയിൽ ഉയർച്ചകൾ നേടിയെടുക്കാൻ.

ഇന്നിപ്പോൾ നമ്മുടെയൊക്കെ ജീവിതം സുഗമമായി മുന്നോട്ട് പോകുവാൻ ഒത്തിരി ജോലികൾ ചെയ്യേണ്ടതായി വന്നേക്കാം. ജോലിക്കിടയിൽ അനുഭവിക്കുന്ന കഷ്ടപ്പാടുകൾ എല്ലാം തന്നെ ജോലിയിൽ നിന്നും ലഭിക്കുന്ന വരുമാനത്തിലൂടെ ഒരുപരിധി വരെയെങ്കിലും ഇല്ലാതെയാകട്ടെ.

മറ്റുള്ളവർക്ക് ഉപദ്രവം ഏൽപ്പിക്കാത്ത ഏതു ജോലിയായാലും അതിന് അതിന്റെതായ മഹത്വമുണ്ട്.ജോലിയിൽ അശ്രദ്ധയും അലസതയും കാണിക്കാതിരിക്കുക.

നമ്മുടെ ജോലി ഒരുപക്ഷെ നമ്മുടെ ചുറ്റിലുമുള്ള ഒത്തിരി മനുഷ്യരുടെ പ്രതീക്ഷകൾ ആയിരിക്കാം.നമ്മുടെ ജോലി മറ്റുള്ളവരുടെ മുന്നോട്ടുള്ള ജീവിതത്തെ വളരെയധികം സ്വധിനിക്കുന്നതായിരിക്കാം.

ജോലികൾക്കിടയിൽ ഉണ്ടാകുന്ന കുറവുകൾ നിരന്തരശ്രമത്തിലൂടെ ഇല്ലാതെയാക്കാൻ നമ്മുടെ ഭാഗത്തുനിന്നും ആത്മാർത്ഥമായി ശ്രമിക്കാൻ സാധിക്കട്ടെ.

നിരന്തരശ്രമത്തിലൂടെ ചെയ്യുന്ന ജോലിയിൽ പ്രാവിണ്യം നേടികൊണ്ടിരിക്കുക.

നമ്മുടെ ഓരോരുത്തരുടെയും ജോലി, നമ്മൾക്കും നമ്മുടെ ചുറ്റിലുമുള്ളവർക്കും സന്തോഷവും സമാധാനവും ലഭിക്കുന്നതാകട്ടെ.

പ്രതിഫലം ആഗ്രഹിക്കാതെ ഒത്തിരി മനുഷ്യർ മറ്റുള്ളവർക്കുവേണ്ടി ജോലി ചെയ്യുന്നുണ്ട്.അവരുടെ നിസ്വാർത്ഥമായ സേവനമനോഭാവത്തെ നന്ദിയോടെ ഓർക്കാം.

പ്രതിഫലത്തിനുവേണ്ടി ജോലി ചെയ്യുന്നവർക്ക്, ജോലിക്ക് അനുസരിച്ചു മാന്യമായ ശമ്പളം നൽകേണ്ടതുണ്ട്. സ്വന്തമായ നേട്ടത്തിനുവേണ്ടി മറ്റുള്ളവരുടെ പ്രതിഫലം നൽകാതിരിക്കരുത്.

മറ്റുള്ളവരുടെ ജീവിതത്തിൽ കണ്ണിരു വീഴ്ത്തികൊണ്ടു നേടുന്ന സന്തോഷമൊന്നും അധികകാലം നിലനിൽക്കില്ല.

നമ്മൾക്ക് ലഭിക്കുന്ന ഓരോ ജോലിയും ആസ്വദിച്ചു ചെയ്യാൻ കഴിയട്ടെ.

ചെയ്യുന്ന ജോലിയിൽ ഏകാഗ്രത നഷ്ടപ്പെടാതിരിക്കാൻ ജോലികൾക്കിടയിൽ ആവശ്യമായ വിശ്രമം എടുക്കേണ്ടതാണ്.

ഓരോ ജോലിക്കു പിന്നിലും ഒത്തിരി കഷ്ടപ്പാടുകളുണ്ട്, അവയെല്ലാം നേരിട്ടാൽ മാത്രമേ ജോലിയിൽ നേട്ടങ്ങൾ സ്വന്തമാക്കാൻ ഒരുപക്ഷെ കഴിയുകയുള്ളു.

നമ്മൾ ഈ ഭൂമിയിലേക്ക് ജനിച്ചുവീണ നാൾ മുതൽ ഈ ഭൂമിയിൽ നിന്നും വിട്ടകലുന്നത് വരെ എത്ര മനുഷ്യരാണ് നമ്മൾക്കുവേണ്ടി ജോലികൾ ചെയ്യേണ്ടി വരുന്നത്.പരാതിയും പരിഭവവുമില്ലാതെ പലരും നമ്മൾക്കുവേണ്ടി ജോലി ചെയ്തത് നന്ദിയോടെ ഓർക്കാം.

പലർക്കും അവരുടെ ജോലിഭാരം നിമിത്തം സന്തോഷം നിറഞ്ഞ ജീവിതം ജീവിച്ചുതീർക്കാൻ സാധിക്കാതെവരുന്നു.ഈ കാലവും കടന്നുപോകും എന്ന് ആശ്വസിക്കാൻ സാധിക്കട്ടെ.

ഏതൊരു ജോലിക്കും ഒരാളെ നിയോഗിക്കാൻ ആ വ്യക്തി തക്കതായ യോഗ്യത നേടേണ്ടതുണ്ട്.

വ്യാജമായ യോഗ്യത സർട്ടിഫിക്കറ്റുകൊണ്ട് ജോലി നേടിയെടുക്കുന്നവർക്ക് അധികകാലമൊന്നും മുന്നോട്ടു പോകുവാൻ സാധിച്ചെന്നു വരില്ല.

നല്ലൊരു ജോലിക്കുവേണ്ടി നമ്മളിൽ പലരും ശ്രമിക്കാറുണ്ടെങ്കിലും പലർക്കും യോഗ്യതക്ക് അനുസരിച്ചുള്ള ജോലികൾക്ക് കിട്ടുക ഒരുപക്ഷെ വളരെ വിരളമായിരുന്നിരിക്കാം.

ഏതു ജോലിയിൽ ആയിരുന്നാലും സത്യസന്ധമായി പ്രവർത്തിക്കുക.

മറ്റുള്ളവരോട് എപ്പോഴും സൗഹാർദ്ദപരമായി പെരുമാറുക.

നമ്മുടെ ഓരോരുത്തരുടെയും വ്യക്തിജീവിതവും ഔദ്യോഗികജീവിതവും തമ്മിൽ കൂടികലർത്താതിരിക്കുക.

നമ്മുടെ ജോലി മറ്റുള്ളവർക്ക് എന്നുമെന്നും പ്രതീക്ഷയും പ്രചോദനവും സന്തോഷവും നൽകുന്നതാകട്ടെ.