ഉണർവിൻ പൊൻകിരണങ്ങൾ:The awakening golden rays-161

ജീവിതത്തിൽ തെറ്റുകൾ സംഭവിക്കാം, തെറ്റുകൾ തിരുത്തി മുന്നേറിയാൽ മാത്രമാണ് വിജയത്തിലേക്ക് എത്താൻ സാധിക്കുകയുള്ളു.

നമ്മുടെയൊക്കെ ജീവിതത്തിൽ തെറ്റ് തിരുത്തലുകൾക്ക് വളരെയേറെ പ്രാധാന്യം കൊടുക്കണം.

ചെയ്തുപോയ തെറ്റുകൾ തിരുത്താൻ കഴിയാതെപോകുന്ന കാര്യങ്ങൾ ഉണ്ടാവാം, മറ്റുള്ളവരുടെ ജീവിതത്തിൽ ഉണ്ടാകുന്ന തോൽവികൾ നമ്മൾക്ക് ഒരു പാഠമാണ്, മറ്റുള്ളവർ വരുത്തിയിട്ടുള്ള തെറ്റുകൾ ആവർത്തിക്കാതിരിക്കാനുള്ള തിരിച്ചറിവ് നൽകുന്നതാണ് അവരുടെ ജീവിതഅനുഭവങ്ങൾ.

പലപ്പോഴും തെറ്റിൽ നിന്നാണ് പാഠങ്ങൾ പഠിക്കുക.മനഃപൂർവം തെറ്റുകൾ ചെയ്യാൻ ശ്രമിക്കാതിരിക്കുക.

ഒരാൾ ചെയ്യുന്ന തെറ്റിലൂടെ ഒരുപക്ഷെ ഒത്തിരി ആളുകളായിരിക്കും വേദനകൾ, ദുരിതങ്ങൾ അനുഭവിക്കേണ്ടി വരിക.

പരാജയങ്ങൾ ഒന്നിന്റെയും അവസാനമല്ല, വിജയികൾ ആയവർക്കെല്ലാം തങ്ങളുടെ ജീവിതത്തിൽ അനുഭവിക്കേണ്ടിവന്ന കഷ്ടപാടുകളുടെ, പരാജയങ്ങളുടെ അനുഭവങ്ങൾ ഒരുപക്ഷെ പങ്കുവെക്കാൻ ഉണ്ടാവും.

വിജയിക്കാൻ ആഗ്രഹിക്കുന്നവർ, തങ്ങളുടെ ചുറ്റിലുമുള്ള തെറ്റുകളിൽ നിന്നും പാഠങ്ങൾ ഉൾക്കൊണ്ട്‌ ശരിയായ വിധത്തിൽ മുന്നോട്ട് സഞ്ചരിക്കുക.

നമ്മളെപ്പറ്റി പലരും പലപ്പോഴും ഇല്ലാത്ത കാര്യങ്ങൾ പറയാറുണ്ട്, നമ്മൾ ചെയ്യുന്നത് നല്ലതെങ്കിൽ, മറ്റുള്ളവർ പറയുന്ന തെറ്റുകൾ എല്ലാം കാലം തിരുത്തിക്കും.

നമ്മൾ എപ്പോഴും ശ്രമിക്കേണ്ടത് നമ്മളുടെ ഭാഗത്ത്‌ നിന്നുമുണ്ടായ തെറ്റുകൾ തിരുത്തുക എന്നതാണ്.

മറ്റുള്ളവരുടെ ജീവിതത്തിലെ തെറ്റുകൾ തിരുത്തുന്നതിനേക്കാൾ എളുപ്പമാണ് ഒരുപക്ഷെ സ്വന്തം ജീവിതത്തിൽ വരുത്തിയിട്ടുള്ള തെറ്റുകൾ തിരുത്താൻ.

പലപ്പോഴും നാം ചെയ്യുന്ന തെറ്റുകൾ എന്തെല്ലാമാണെന്ന് തിരിച്ചറിയാൻ കഴിയാതെ പോകുന്നു.

നമ്മൾ ചെയ്യുന്ന നല്ല കാര്യങ്ങൾക്ക് പ്രോത്സാഹനം നൽകുന്നതിനേക്കാൾ നമ്മളിലെ തെറ്റുകൾ ചുണ്ടികാണിക്കാനാണ് ഭൂരിഭാഗം ആളുകൾക്കും ഒരുപക്ഷെ താല്പര്യം ഉണ്ടാകുക.തെറ്റുകൾ ചുണ്ടികാണിക്കേണ്ടത് തന്നെയാണ്,തെറ്റുകൾ തിരുത്താൻ ഉള്ളവയാണ്.

ജീവിതത്തിൽ നമ്മൾക്കു ചുറ്റിലുമുള്ള ശരി തെറ്റുകൾ നമ്മൾ ഓരോരുത്തരും മനസ്സിലാക്കിയെടുക്കണം.

മറ്റുള്ളവർ ചെയ്യുന്നതെല്ലാം തെറ്റ്, നാം ചെയ്യുന്നത് മാത്രം ശരി എന്നുള്ളത് എല്ലായിപ്പോഴും ശരിയാവണം എന്നില്ല.

നമ്മുടെ ഭാഗത്തു നിന്നുമുള്ള തെറ്റുകൾ അംഗീകരിക്കുന്നതിനോടൊപ്പം തെറ്റുകൾ തിരുത്താൻ തയ്യാറാവണം.

തെറ്റുകൾക്ക് അധികകാലം നിലനിൽപ്പ് ഇല്ല.

എത്രയും നേരെത്തെ തെറ്റ് തിരുത്താൻ തയ്യാറാകുന്നോ അത്രയും നേരത്തെ ജീവിതത്തിൽ വിജയം നേടിയെടുക്കാൻ എളുപ്പം കഴിയും.

വാഹനം ഓടിക്കുന്ന വ്യക്തി, എങ്ങനെ റോഡിലൂടെ വാഹനം ഓടിക്കുമ്പോൾ ശ്രദ്ധിക്കണം എന്നുള്ള നിയമാവലി ശരിക്കും മനസ്സിലാക്കി ഇരിക്കണം, നമ്മുടെ ഇഷ്ടത്തിന് തോന്നിയതുപോലെ റോഡിൽ വാഹനവുമായി ഇറങ്ങിയാൽ അപകടം സംഭവിക്കാൻ സാധ്യതയുണ്ടല്ലോ.

ചില തെറ്റുകളുടെ അനന്തരഫലം ഭയാനകം ആയിരിക്കും, ഒരുപക്ഷെ തെറ്റിലൂടെ ഉണ്ടാകുന്ന നഷ്ടങ്ങൾ ഒരിക്കലും തിരിച്ചുകിട്ടുകയില്ല.

നിമിഷസുഖത്തിനു വേണ്ടി ചെയ്യുന്ന പലതും തെറ്റല്ല എന്നുള്ള ചിന്തയിൽ പലരും മുന്നോട്ട് പോകും, ഒടുവിൽ തെറ്റിൽ നിന്നും മോചനം കിട്ടാതെ ഒരുപക്ഷെ ജീവിതത്തിൽ വളരെയേറെ നിരാശയിൽ കഴിയേണ്ടി വരുന്നവരുണ്ട്.

അടയ്ക്ക ആണെങ്കിൽ മടിയിൽ വെക്കാം അടക്കാമരമാണെങ്കിൽ മടിയിൽ വെക്കാൻ കഴിയില്ലല്ലോ എന്നൊക്കെ ചൊല്ല് പലരും പറയാറുണ്ട്, മറ്റുള്ളവർ ചെയ്യുന്ന തെറ്റുകൾ, തെറ്റാണെന്നു ബോധ്യപ്പെടുത്തിയാലും ഒരുപക്ഷെ അവരൊന്നും അതൊന്നും കാര്യമാക്കാറില്ല, നമ്മളെക്കാൾ അവരെല്ലാം പ്രായത്തിൽ മുതിർന്നതാണ്/പ്രായത്തിൽ ഇളയതാണ് എന്ന് കരുതി തെറ്റുകൾ ആർക്കും എപ്പോൾ വേണമെങ്കിലും സംഭവിച്ചുകൂടെന്നില്ലല്ലോ.

നമ്മളുടെ ഭാഗത്തുനിന്നും വന്നിട്ടുള്ള തെറ്റുകൾ നമ്മുടെ കഴിവിന്റെ പരമാവധി തിരുത്തിയെടുക്കുക, ജീവിതത്തിൽ കൂടുതൽ സന്തോഷം, സമാധാനം കണ്ടെത്താൻ തെറ്റുകൾ തിരുത്തുന്നതിലൂടെ സാധിക്കട്ടെ.