ഉണർവിൻ പൊൻകിരണങ്ങൾ:The awakening golden rays-85

പല സാഹചര്യത്തിലും മനുഷ്യർ ഒറ്റപ്പെട്ടു പോകാറുണ്ട്. ഒറ്റപ്പെട്ടു പോകുന്നവർ അനുഭവിക്കുന്ന വേദന വളരെ ഭയാനകമാണ്.

ഒറ്റപ്പെട്ട സാഹചര്യത്തിലൂടെ കടന്നുപോകുന്ന ഒത്തിരി മനുഷ്യർ നമ്മൾക്കിടയിലുണ്ട്. ഒറ്റപ്പെട്ട സാഹചര്യം നമ്മൾ ശരിയായ വിധത്തിൽ ഉപയോഗിക്കാൻ പഠിക്കേണ്ടതുണ്ട്.

നമ്മളെ ഇന്നലെകളിൽ ഒറ്റപ്പെടുത്തിയവർ നമ്മളെ ഇന്ന് ചേർത്തു പിടിക്കുന്നുണ്ടാകാം.

നമ്മൾക്ക് നഷ്ടങ്ങൾ ഒരുപാട് ഉണ്ടാകുമ്പോൾ നമ്മളിൽ നിന്നും പലരും അകന്നുപോയേക്കാം. നമ്മൾക്ക് നേട്ടങ്ങൾ ഉണ്ടാകുമ്പോൾ അകന്നുപോയ പലരും അടുപ്പം കൂടിയേക്കാം.

നമ്മൾ ഏതൊരു അവസ്ഥയിൽ ആണെങ്കിലും നമ്മൾക്ക് എല്ലാകാലവും തുണ നമ്മൾ മാത്രമാണ് എന്നത് മറക്കാതിരിക്കുക.

നമ്മൾ ആരും തന്നെ ഒറ്റപ്പെടാൻ ആഗ്രഹിക്കുന്നവർ അല്ലല്ലോ, സാഹചര്യമാണ് നമ്മളെ ഒറ്റപ്പെടുത്തുന്നത്.

നമ്മൾ എത്ര ഒറ്റപ്പെട്ടാലും നമ്മളുടെ ശക്തി വേണ്ടതുപോലെ ഉപയോഗിച്ചാൽ ഒരുപക്ഷെ നമ്മൾക്ക് നഷ്ടപ്പെട്ടതിനേക്കാൾ അധികമായി നേട്ടങ്ങൾ സ്വന്തമാക്കാൻ സാധിച്ചേക്കാം.

ഒറ്റപ്പെടൽ ഉണ്ടാകുമ്പോൾ അതിനെ ശരിയായ വിധത്തിൽ നേരിടുക.

സാമ്പത്തികം ഇല്ലാത്ത അവസ്ഥകൾ പലരെയും ഒറ്റപ്പെടുത്തുന്നവയാണ്. രോഗങ്ങൾ , ദുരിതങ്ങൾ, നഷ്ടങ്ങൾ എല്ലാം മനുഷ്യരെ ഒറ്റപ്പെടലിന്റെ അവസ്ഥകളിലേക്ക് എത്തിച്ചേക്കാം.

ഈ അവസ്ഥകളിൽ പോലും നമ്മൾക്ക് ശക്തിയോടെ പൊരുതാൻ കഴിയേണ്ടതുണ്ട്. നമ്മുടെ കഴിവുകളെ വേണ്ടതുപോലെ ഉപയോഗിച്ചുകൊണ്ട് മുന്നോട്ടു പോകുവാൻ നമ്മൾ ഏവർക്കും സാധിക്കട്ടെ.

എല്ലാ മനുഷ്യരും അവസാനം ഒറ്റക്ക് ആകും എന്നത് പ്രപഞ്ചസത്യമാണ്. നമ്മളുടെ ശ്വാസം അവസാനിക്കുന്നതുവരെ നമ്മളെകൊണ്ട് കഴിയുന്നതുപോലെ മറ്റുള്ളവരെ ശരിയായ കാര്യങ്ങൾക്കുവേണ്ടി സഹായിക്കാൻ തയ്യാറാവുക.

ഈ ലോകത്തു നമ്മളെകൊണ്ട് ചെയ്യേണ്ട കാര്യങ്ങൾ മറ്റാർക്കും നമ്മൾക്കു പകരം ചെയ്യാൻ കഴിയില്ല എന്നതു മനസ്സിലാക്കി നമ്മുടെ സമയം പ്രയോജനപ്രദമായ കാര്യങ്ങൾക്കുവേണ്ടി വിനിയോഗിക്കുക.

നമ്മൾ ഓരോരുത്തർക്കും ലഭിച്ചിരിക്കുന്ന സമയം വേണ്ടതുപോലെ പ്രയോജനപ്പെടുത്താൻ തയ്യാറായാൽ നമ്മുടെ ജീവിതത്തിൽ ഉണ്ടാകുന്ന ഒറ്റപ്പെടുന്ന അവസ്ഥകളെയൊക്കെ ഒരു പരിധി വരെ ഒഴിവാക്കാൻ സാധിച്ചേക്കും.