മനം നിറക്കാൻ മധുമന്ത്രങ്ങൾ:mantras to fill the mind-328

നമ്മളിൽ പലർക്കും എവിടെയെങ്കിലും സങ്കടങ്ങൾ ഇല്ലാതെ ഇരിക്കില്ല.ഒത്തിരി സന്തോഷിക്കണമെങ്കിൽ സങ്കടം എന്താണ് എന്ന് അറിഞ്ഞിരിക്കേണ്ടത് അത്യാവശ്യമാണ്.ഇന്നലെകളിൽ നമ്മുടെ ഭാഗത്തു നിന്നുണ്ടായ തെറ്റുകളെ ഓർത്തു സങ്കടപ്പെടുന്നവരുണ്ടാകാം,മറ്റുള്ളവരെ വേണ്ട വിധം സഹായിക്കാൻ പറ്റാത്തത് കൊണ്ടുള്ളതു ഉണ്ടാകാം.

എവിടെയൊക്കെ സങ്കടങ്ങൾ ഉണ്ടോ അവിടെയെല്ലാം സന്തോഷത്തിനുള്ള വഴി ഒളിഞ്ഞു കിടപ്പുണ്ട് അത് കണ്ടുപിടിക്കാനാണ് ശ്രമിക്കേണ്ടത്.

ഓരോ മനുഷ്യരുടെയും വിയോഗങ്ങൾ നമ്മളിൽ സങ്കടങ്ങൾ സൃഷ്ടിക്കുന്നുണ്ട്.നമ്മളുടെ ജീവിതം ക്ഷണികമാണ് എന്തിനാണ് നമ്മൾ ഇങ്ങനെ സങ്കടപ്പെട്ടു കൊണ്ടിരിക്കുന്നത് അത് കൊണ്ട് എന്തെങ്കിലും നേട്ടം ഉണ്ടോ?. കൂടുതൽ കരുത്താർജിക്കുക ഇന്ന് ഈ നിമിഷം സന്തോഷത്തോടെ കഴിയുവാൻ ശ്രമിക്കുക.

ഇന്നലെ വരെ ഒത്തിരി കാര്യങ്ങളിൽ നമ്മുടെ കണ്ണുകൾ സങ്കടത്താൽ നിറഞ്ഞു പോയിട്ടുണ്ടാകാം.നമ്മൾക്ക് ആവശ്യമുള്ളതിൽ മാത്രം നമ്മുടെ ശ്രദ്ധ ചെലുത്തുക നമ്മൾ എത്തേണ്ട ലക്ഷ്യസ്ഥാനങ്ങളിൽ എത്തുവാൻ ശ്രമിക്കാം.

ഏതു സങ്കടത്തിനും ഒരു അവസാനം ഉണ്ടാകും അതുപോലെ ഒരു തുടക്കവും.നമ്മൾക്ക് തിരിച്ചറിയാൻ ശ്രമിക്കാം എന്തുകൊണ്ടാണ് നമ്മളെ ഇത്രമാത്രം സങ്കടപ്പെടുത്തുന്നത് എന്ന്.എന്തെങ്കിലും ജീവിതത്തിൽ മാറ്റങ്ങൾ വരുത്തിയാൽ സങ്കടങ്ങൾ മാറ്റാൻ കഴിയുമോ എന്ന്.

സ്നേഹം പ്രതിഷിക്കുന്നിടത്തു നിന്ന് കിട്ടുന്ന അവഗണനകളാണ് ഒത്തിരി അധികം ആളുകൾക്കും കൂടുതൽ സങ്കടങ്ങൾ കൊണ്ടുവന്നിട്ടുള്ളത്.

ഒരു രാത്രിക്കു പകൽ എന്നതുപോലെ പലരുടെയും സ്നേഹത്തിൽ കാലങ്ങൾ കഴിയുമ്പോൾ മാറ്റങ്ങൾ സംഭവിക്കാം.ആരൊക്കെ നമ്മളെ സ്നേഹിച്ചുവോ ആരെയൊക്കെ നമ്മൾ സ്നേഹിച്ചുവോ അവിടെയെല്ലാം എന്തെങ്കിലും മാറ്റങ്ങൾ ഒരുപക്ഷെ സംഭവിക്കാം കൂടുതൽ തിരിച്ചറിവുകൾ ഉണ്ടാകുമ്പോൾ.

ജീവിതത്തിൽ അർഥം കണ്ടെത്താൻ ഒരു പക്ഷെ കഴിയുന്നത് വളരെയേറെ സങ്കടപ്പെടുമ്പോൾ ആയിരിക്കും.എത്രയോ ആളുകൾ സ്വന്തം ജീവിതത്തിൽ വേദനകൾ വന്നപ്പോൾ അതെ വേദനകൾ അനുഭവിക്കുന്ന മറ്റുള്ളവരെ സഹായിക്കാൻ മുന്നിട്ടിറങ്ങിയിരിക്കുന്നത്.നമ്മൾ ഇന്ന് വളരെ ചെറുപ്പമാണ് എങ്കിൽ നാളെ നമ്മൾ വാർദ്ധക്യത്തിൽ എത്തും അതിപ്പോൾ ആർക്കും തടയാൻ ആകില്ല.

ഇന്ന് ഇപ്പോൾ തന്നെ നമ്മുടെ മനസ്സിനെ ശക്തിപ്പെടുത്താം നാളെകളിൽ സംതൃപ്തിയോടെ ജീവിക്കാൻ ഇന്നിന്റെ വേദനകളെ മറന്നുകൊണ്ട് നല്ല നല്ല കാര്യങ്ങൾ ചെയ്യുക.

നാളെകളിൽ എന്തെങ്കിലും തരത്തിൽ മറ്റുള്ളവരെ സഹായിക്കാൻ കഴിയണം എന്നുണ്ടെങ്കിൽ, മറ്റുള്ളവരുടെ ജീവിതത്തിൽ സന്തോഷങ്ങൾ നൽകണം എന്നുണ്ടെങ്കിൽ, തീർച്ചയായും നമ്മുടെ ജീവിതത്തിൽ ഉണ്ടായിട്ടുള്ള എല്ലാ വേദനകളെയും മറന്നു നമ്മുടെയും, നമ്മുടെ വേണ്ടപ്പെട്ടവരുടെയും കാര്യങ്ങളിൽ അതിവ ശ്രദ്ധ ചെലുത്തുക.

ജീവിതത്തിൽ സന്തോഷങ്ങൾ വരാൻ കാത്തിരിക്കുക, പരിശ്രമിക്കുക.ഒരു നാൾ നമ്മുടെ സങ്കടങ്ങൾ നമ്മളിൽ നിന്നും അകലാൻ തുടങ്ങുന്നത് കാണുവാൻ സാധിക്കും.

നമ്മൾ എത്രയോ ആളുകളെ കണ്ടിരിക്കുന്നു ഏതു പ്രതിസന്ധി ഘട്ടങ്ങളിലും തളരാതെ, ജീവിതത്തിൽ ഉണ്ടായ വെല്ലുവിളികളെ സധൈര്യം നേരിട്ടവരെ ഒടുവിൽ അവരുടെ മുന്നിൽ ഒട്ടുമിക്ക പ്രതിസന്ധികളും ഇല്ലാതെ ആയത്.

ഇന്നിന്റെ സങ്കടങ്ങൾ നാളെ നമ്മളുടെയും മറ്റുള്ളവരുടെയും ജീവിതങ്ങൾക്ക് കൂടുതൽ കരുത്തുപകരട്ടെ.

ദുഃഖിക്കാൻ ഒത്തിരി കാരണങ്ങൾ നമ്മൾ കണ്ടെത്തുമ്പോൾ സന്തോഷിക്കാനുള്ള കാരണം കണ്ടെത്താൻ നമ്മൾക്കൊരുത്തർക്കും കഴിയട്ടെ.