മനം നിറക്കാൻ മധുമന്ത്രങ്ങൾ:mantras to fill the mind-98

ഒട്ടു മിക്ക മനുഷ്യരും കാത്തിരിക്കുന്നത് നാളെകളെകുറിച്ചുള്ള നല്ല പ്രതീക്ഷകളെയാണ്.നമ്മളിൽ പലർക്കും ഒരു പ്രതീക്ഷയും ചിലപ്പോൾ നാളെകളെക്കുറിച്ച് ഉണ്ടായെന്ന് വരില്ല, അപ്പോൾ നമ്മളിൽ സ്വാഭാവികമായും നിരാശ വന്നേക്കാം.

ജീവിതത്തിലെ പ്രതിസന്ധികളോട് പൊരുതി വിജയം നേടിയിട്ടുള്ളവർക്ക് ഒരിക്കലെങ്കിലും പ്രതീക്ഷകൾ ഇല്ലാതിരുന്ന സമയങ്ങൾ ഒരുപക്ഷെ ഉണ്ടായിട്ടുണ്ടാവാം.

ജീവിതത്തിൽ എന്തെങ്കിലും നമ്മൾ നേടിയിട്ടുണ്ടെങ്കിൽ, കഷ്ടപ്പെടാൻ തയ്യാറായതിന്റെ പിന്നിൽ നാളെകളിൽ നിരാശകൾ ഉണ്ടാവരുത് അല്ലെങ്കിൽ നിരാശപ്പെടേണ്ടിവരും എന്ന ചിന്ത ഉള്ളതുകൊണ്ടാണ്.

ഒത്തിരി നാളായി വിജയം നേടാൻ കാത്തിരിക്കാൻ തുടങ്ങിയിട്ട് ഇതുവരെയും വിജയം കിട്ടിയില്ല ഇനി ഇപ്പോൾ കാത്തിരിക്കുന്നതിൽ അർത്ഥം ഇല്ല എന്നൊക്കെ ഒരു പക്ഷെ നമ്മുടെ മനസ്സ് പറയും അവിടെയെല്ലാം ജീവിതകാലം മുഴുവൻ വിജയത്തിനുവേണ്ടി ശ്രമിക്കാനും ക്ഷമയോടെ കാത്തിരിക്കാൻ തയ്യാറാകാനുള്ള മനസ്സാണ് വേണ്ടത്.

ഓരോ തോൽ‌വിയിൽ നിന്നും നമ്മൾക്ക് പഠിക്കാൻ ഒത്തിരി കാര്യങ്ങളുണ്ട്, നാളെ നമ്മൾക്ക് പ്രതീക്ഷകൾ നൽകുന്നത് ഇത്തരം തോൽവികളാണ്.

കുഞ്ഞുനാളിൽ നമ്മളെല്ലാം സൈക്കിൾ ചവിട്ടാൻ പഠിച്ചപ്പോൾ സൈക്കിളിൽ നിന്നും ഒരുപക്ഷെ മറിഞ്ഞു വീണവരായിരിക്കാം. അവിടെയൊക്കെ നമ്മൾ നിരാശയോടെ ഇനി ഒരിക്കലും പഠിക്കില്ല, എന്നെ കൊണ്ട് പഠിക്കാൻ സാധിക്കില്ല എന്ന് വിചാരിച്ചിരുന്നില്ല പകരം നമ്മൾ പ്രതീക്ഷയോടെ, വളരെ അധികം ഉത്സാഹത്തോടെ കഷ്ടപ്പെട്ട്, ഒടുവിൽ സൈക്കിൾ ചവിട്ടാൻ പഠിച്ചു.നമ്മുടെ ഉള്ളിലെ ത്രിവമായ ആഗ്രഹമാണ് പഠനം വിജയകരമാക്കാൻ അപ്പോഴൊക്കെ സഹായിച്ചത്.

നമ്മൾ കാത്തിരിക്കുന്ന എന്ത് കാര്യമായിക്കോട്ടെ അതിനു വേണ്ടി നമ്മുടെ ഭാഗത്തുനിന്ന് എന്തെങ്കിലുമൊക്കെ പരിശ്രമങ്ങൾ വേണ്ടി വരും.

മുൻപിൽ യാതൊരുവിധ പ്രതീക്ഷകൾ ഇല്ലാത്തവർക്ക്  പോലും കാത്തിരിക്കാൻ ഒരു കാരണമുണ്ട്.

ജീവിതത്തിൽ എവിടെയെങ്കിലും പ്രതീക്ഷകൾ ഇല്ലാതെ ആകുമ്പോഴും, നിരാശകൾ നമ്മുടെ ജീവിതങ്ങളിൽ നിറയുമ്പോഴും എവിടെയെങ്കിലും ഒരു വെളിച്ചം നമുക്കായി കാത്തിരിക്കുന്നുണ്ടാകും.
ആ നല്ല സമയത്തിനായി കാത്തിരിക്കാം.

ജീവിതത്തിൽ എന്തെങ്കിലും നേടാൻ കഴിയാതെ പോയാൽ നിരാശ പെടേണ്ടതില്ല, ഇനിയും സമയം ബാക്കിയുണ്ട് ചെറിയ കാര്യങ്ങൾ ചെയ്തു മുന്നോട്ടു പോകുക ഒടുവിൽ നമ്മളെ കാത്തിരിക്കാനും, നമ്മൾക്ക് കാത്തിരിക്കാനും, ഒത്തിരി സന്തോഷങ്ങളും പ്രതീക്ഷകളും കൂടെ ഉണ്ടാകും.

സന്തോഷം കിട്ടാൻ വേണ്ടി നമുക്ക് എല്ലാവർക്കും പ്രതീക്ഷയോടെ, പരിശ്രമിച്ചുകൊണ്ട് കാത്തിരിക്കാം.