മനം നിറക്കാൻ മധുമന്ത്രങ്ങൾ:mantras to fill the mind-116

തണൽ ആഗ്രഹിക്കാത്തവരായിട്ട് നമ്മൾക്കിടയിൽ ആരുമുണ്ടാവില്ല.വെയിലേറ്റ് തളർന്നവർക്ക് തണൽ വലിയൊരു ആശ്വാസമാണ്.

നമ്മൾ നാളിതുവരെയായി വളർന്നിട്ടുള്ളത് മറ്റുള്ളവരുടെ തണലിലാണ്. നമ്മൾ പലപ്പോഴും കഷ്ടപ്പാടുകൾ നേരിടേണ്ടി വരാതിരുന്നതിന്റെ പ്രധാന കാരണം നമ്മൾക്ക് വേണ്ടി മറ്റുള്ളവർ കഷ്ടപ്പെടാൻ തയ്യാറായതുകൊണ്ടാണ്.

നമ്മുടെ ജീവിതത്തിൽ അപ്രതീക്ഷിതമായി പല കാര്യങ്ങളും സംഭവിച്ചേക്കാം. നമ്മൾക്കു നാളുകളായി തണലായിരുന്നവർ നമ്മളിൽ നിന്നും ഒരുപക്ഷെ സാഹചര്യം നിമിത്തം അകന്നുപോയേക്കാം, മരണം വഴി നമ്മളിൽ നിന്നും വേർപിരിഞ്ഞെന്ന് വരാം.

നമ്മളുടെ തണൽ നമ്മൾക്ക് നഷ്ടപ്പെട്ട അവസ്ഥകൾ ഉണ്ടായേക്കാം, അവിടെയെല്ലാം ആത്മവിശ്വാസത്തോടെ മുന്നേറാൻ, കൂടുതൽ ഉയരങ്ങളിൽ എത്തിച്ചേരാൻ നമ്മൾ ഓരോരുത്തരും ആത്മാർഥമായി പരിശ്രമിക്കേണ്ടതുണ്ട്.

ജീവിതത്തിൽ ഉണ്ടാകുന്ന നഷ്ടങ്ങളെ യാഥാർഥ്യം മനസ്സിലാക്കി ഉൾകൊള്ളാൻ നമ്മൾക്ക് കഴിയേണ്ടതുണ്ട്.

നമ്മൾക്ക് നഷ്ടമായത് പലതും എത്ര ശ്രമിച്ചാലും തിരിച്ചെടുക്കാൻ കഴിയുന്നവയല്ല. നമ്മൾക്ക് ഭാവിയിൽ കൂടുതൽ നഷ്ടപ്പെടലുകൾ ഒഴിവാക്കാൻ ചെയ്യുന്ന കാര്യങ്ങളിൽ വളരെയേറെ ശ്രദ്ധിക്കാം, ആവശ്യമായ മുൻകരുതൽ സ്വീകരിക്കാം.

നമ്മൾക്ക് ലഭിച്ച തണൽ നഷ്ടപ്പെട്ടതിൽ സങ്കടപ്പെട്ടിരിക്കാതെ, നഷ്ടങ്ങളെ ശരിയായ വിധത്തിൽ ഉൾക്കൊണ്ട്‌ മുന്നോട്ടു നമ്മളാൽ കഴിയുന്ന നല്ല രീതിയിൽ മറ്റുള്ളവർക്ക് തണലാകുവാൻ സാധിക്കട്ടെ.