നേർവഴി സഞ്ചാരങ്ങൾ:Straight Path Journeys-44

 സങ്കടങ്ങൾ നമ്മളിലേക്ക് പലപ്പോഴായി കടന്നുവരാറുണ്ട്. നമ്മൾ എത്ര ശ്രമിച്ചാലും ചില സങ്കടങ്ങൾ നമ്മളിൽ നിന്നും പെട്ടെന്നൊന്നും ഒഴിഞ്ഞുപോകാറില്ല.

ഇന്നലെകളിലെ പല സങ്കടങ്ങളും ഇന്നിപ്പോൾ നമ്മൾക്ക് സങ്കടമാകാറില്ല. ഇന്നലെകളിൽ സങ്കടം നൽകിയ കാര്യങ്ങളിൽ നിന്നും ഉൾകൊണ്ട തിരിച്ചറിവുകളും, തീരുമാനങ്ങളും ആയിരിക്കാം ഒരുപക്ഷെ ഇന്നിപ്പോൾ നമ്മൾ കൈവരിച്ച നേട്ടങ്ങൾക്കുള്ള പ്രധാന കാരണം.

എത്ര പണം ഉണ്ടെങ്കിൽ പോലും പല സങ്കടങ്ങളും നമ്മൾക്ക് പൂർണ്ണമായി മാറ്റിയെടുക്കാൻ കഴിഞ്ഞെന്നു വരില്ല.

നഷ്ടങ്ങളും, പ്രതിസന്ധികളും, ദുരിതങ്ങളും, തോൽവികളും, രോഗങ്ങളും,മരണങ്ങളും, വേണ്ടപ്പെട്ട മനുഷ്യരുടെ അകൽച്ചകളുമെല്ലാം സങ്കടങ്ങൾക്ക് കാരണമായേക്കാം.

നമ്മളിൽ ചിലർക്കെങ്കിലും ഒരുപക്ഷെ ഒരിക്കലും മറക്കാൻ പറ്റാത്ത വിധത്തിലുള്ള സങ്കടങ്ങൾ ഉള്ളിൽ കൊണ്ടു നടക്കുന്നവരുണ്ടാകാം. നമ്മൾ പരിശ്രമിച്ചാൽ മാത്രമാണ് നമ്മളിലെ സങ്കടങ്ങളെ ഒരു പരിധി വരെയെങ്കിലും അകറ്റാൻ കഴിയുകയുള്ളു.

സങ്കടങ്ങളെക്കുറിച്ച് ആലോചിച്ചുകൊണ്ട് നിരാശപ്പെട്ടിരുന്നാൽ, നഷ്ടപ്പെട്ട വിലപ്പെട്ട സമയങ്ങൾ ഒരിക്കലും തിരിച്ചു കിട്ടുകയില്ല.

ഏതൊരാൾക്കും സങ്കടം ഒരിക്കലും ഇനിയുള്ള നാളുകളിൽ ഉണ്ടാവില്ലായെന്നൊന്നും ഉറപ്പ് പറയാൻ കഴിയില്ല.

നമ്മൾക്കുണ്ടാകുന്ന സങ്കടങ്ങളെ വേണ്ട വിധത്തിൽ പരിഹരിക്കാനുള്ള ആത്മാർത്ഥമായ പരിശ്രമം നമ്മുടെ ഭാഗത്തുനിന്നും ഉണ്ടായേ തിരുള്ളൂ.

നമ്മൾക്കുണ്ടായ ഓരോ സങ്കടങ്ങളും നാളേകളിൽ വലിയ മാറ്റങ്ങൾക്ക് കാരണമായി തീരട്ടെ.

നികത്താനാവാത്ത നഷ്ടങ്ങളെപറ്റി സങ്കടപ്പെട്ടിരിക്കുന്നതിൽ അർത്ഥമില്ല. ഇന്നലെകൾ നമ്മളിൽ നിന്നും കടന്നുപോയി ഇനി മുന്നിലുള്ള സമയം ഓരോന്നും വളരെയേറെ വിലപ്പെട്ടതാണെന്ന് തിരിച്ചറിഞ്ഞുകൊണ്ട്,സങ്കടങ്ങളെ പരമാവധി അകറ്റി നിർത്തികൊണ്ട് ഉണർവോടെ പ്രവർത്തിക്കാൻ നമ്മൾ ഓരോരുത്തർക്കും കഴിയട്ടെ.